Comunn na Gàidhlig - Leasachadh na Gàidhlig ¦ Gaelic Development Blog

Artair trang ann an Uibhist

2012-01-10T14:50:00.001Z

Chuir Artair Donald seachad làithean ag obair airson Iomairt Ghàidhlig Uibhist a Deas & Èirisgeigh anns an Dùbhlachd.

Thadhail e air buidhnean sgoil-àraich, pàrant is pàiste, buidheann òigridh ann an Dalbrog agus am buidheann Òigridh Uibhist ann an Sgoil Lionacleit.

Chuir e seachad na làithean a’ dèanamh diofar bùthan-obrach spòrsail do gach aois, tro mheadhain na Gàidhlig.

Fhuair an fheadhainn is òige cothrom geamaichean a chluich agus an fheadhainn is sine sgilean dràma agus mòran rudan feumail eile.

Ghabh suas ri 55 duine-cloinne pàirt as na bùthan-obrach agus chòrd e riutha air fad.

Oidhche Shamhna aig Sradagan Ghlaschu

2011-11-07T14:44:00.001Z

Abair gun robh oidhche eagallach aig Sradagan Ghlaschu bho chionn ghreis nuair a nochd na buill le aodach coimheach orra! Tha sinn a tuigsinn gun d’ fhuair na luchd-stiùiridh air falbh beò....

Bidh Sradagan Ghlaschu a’ coinneachadh Oidhche Ardaoin 6:30 – 8f aig àm teirm Sgoil Ghàidhlig Ghlaschu.

Na Geamaichean Gàidhealach Èirisgeigh

2011-10-26T14:25:00.005+01:00

Chaidh latha soirbheachail de Na Geamaichean Gàidhealach a chumail ann an Èirisgeigh air an 15mh latha den Dàmhair.
Ghabh an òigridh pàirt ann an mòran rudan bho Tug of War agus a’ tilgeil a chabair.
’S e Mìcheal Caimbeul agus Kathleen Chaimbeul a fhuair na puingean is àirde aig an deireadh airson na duaisean a bhuannachadh. Fhuair a chlann air fad bonn airson pàirt a ghabhail.
Chaidh an latha a chuir air dòigh leis an Iomairt le taic bho Phròiseact Òigridh nan Eilean. Taing cuideachd gu Megan a thug taic dhuinn air an latha agus Iain MacFhionghain a thug seachad na duaisean.

Seiseanan-Cluich Uibhist

2011-10-25T13:26:00.007+01:00

Chithear dealbhan an seo den òigridh a ghabh pàirt anns na seiseanan-cluich a chaidh a chumail tro na saor-làithean ann an Uibhist.
Chaidh na seiseanan seo a chuir air dòigh le Iomairt Ghàidhlig Uibhist a Deas agus Èirisgeigh ann an com-pàirteachas le Pròiseact Òigridh na Eilean.

Sgoil Èirisgeigh

2011-09-05T13:08:00.001+01:00

Thòisich am-bliadhna sgoil ùr ann an Èirisgeigh leis an òigridh air fad ann am foghlam tro mheadhan na Gàidhlig. Air a' chiad latha aca air ais, dh'ionnsaich iad mòran mu dheidhinn a' chànain agus cho cudromach 's a tha e Gàidhlig a chumail beò agus làidir anns an sgìre aca. Chaidh cuireadh a thoirt do Mhàiri Anna Chaimbeul, Oifigear Iomairt Ghàidhlig Uibhist a Deas, a dhol a-null airson farpais cheist a dhèanamh tro mheadhan na Gàidhlig. Rinn an òigridh air fad uabhasach fhèin math agus thathar an dòchas gum bi cothroman eile ann dhan Iomairt taic a thoirt dhaibh.

Chithear an òigridh leis na bagaichean de stuth a fhuair iad airson pàirt a ghabhail anns an fharpais cheist.

Seachdain nan Òganach 2011

2011-09-01T11:31:00.004+01:00

Chaidh Seachdain nan Òganach 2011 a chumail air a' chiad seachdain dhen Lùnastal.
Bha dà sheisean air a chur air dòigh am-bliadhna; ann an Dalabrog anns a' mhadainn agus ann am Baile a' Mhanaich gach feasgar. Bha 35 duine-cloinne an làthair eadar an dà àite agus iad siud eadar 3-6 bliadhna a dh'aois.

Fhuair an òigridh cothrom a dhol an sàs ann am mòran rudan spòrsail tro mheadhan na Gàidhlig; dràma, ealain, seinn agus geamannan nam measg. Dh'obraich iad air fad gu math cruaidh, le taic bho Anne Marie NicDhòmhnaill, agus chaidh consart bheag a chur air dòigh air an Dihaoine airson cothrom a thoirt dha na teaghlaichean aig an òigridh tighinn a choimhead air na bha iad air a bhith a' dèanamh.

Dh'ionnsaich an òigridh mòran agus chòrd an t-seachdain riutha fhèin air fad agus ris na h-inbhich a bha an sàs.

Samhradh 2011 ann an Uibhist

2011-09-01T11:23:00.007+01:00

Bha samhradh trang ann an Uibhist agus cothroman aig òigridh na sgìre diofar chur-seachadan fheuchainn. Chuir an Iomairt seiseanan cluich air dòigh, eadar Èirisgeigh agus Càirinis, ann an com-pàirteachas le Pròiseact Òigridh nan Eilean. Bha mu 35 de dh’ òigridh an làthair aig na seiseanan seo agus fhuair iad cothrom a dhol an sàs ann an ealain, geamannan agus bèicearachd.

Chaidh bùithtean-obrach tro mheadhan na Gàidhlig a chur air dòigh cuideachd ann an Dalabrog airson sgilean ùra ionnsachadh dhan òigridh. Bha cothrom aca obrachadh le camara didseatach agus prògram coimpiutair airson diofar seòrsa atharrachaidhean a dhèanamh air na dealbhan. Bha bùth-obrach eile ann cuideachd airson eòlas fhaighinn air filmeadh, bho air cùlaibh agus air beulaibh a' chamara. Bha an òigridh gu math dìcheallach le bhith a' cleachdadh Gàidhlig fhad 's a bha iad a' cur nan sgilean ùra seo an cèill. Chaidh na bùithtean-obrach seo a lìbhrigeadh le Ishi NicIlleathain.

Iomairt Ghàidhlig Iar-thuath Leòdhais a’ cur diofar thachartasan air adhart san sgìre

2011-08-11T11:23:00.005+01:00

Chaidh cothrom a thoirt do 12 òigridh bho Nis gu Balantruiseal tighinn còmhla gus tachartasan spòrsail fheuchainn tro na saor làithean – agus abair gun gabh iad an cothrom! Chur Iomairt Ghàidhlig Iar Thuath Leòdhais seachdain, ‘Brag’, air dòigh gus am faigheadh òigridh a thighinn còmhla gus beagan spòrs a dhèanamh, sgilean ùra ionnsachadh, diofar chur-seachadan fheuchainn agus cuideachd an cuid Ghàidhlig a cleachdadh agus a’ gleusadh ann an suidheachaidhean neo-fhoirmeil.

Bha a’ bhuidheann a’ coinneachadh gach madainn, aig 9.30 an Talla Coimhearsnachd Clan Macquarrie agus bha iad ri diofar rudan gu co dhiù 2.30 gach là, Dimàirt – Dihaoine! Seo agaibh blasad air na bha iad ris gach là:

Dimàirt – Chaidh an là a chuir seachad ag iasgachd air bàta ann an Loch Erisort agus aig loch beag eile aig Murchadh Moireasdan ann an Keose. Nar cuideachadh latha an iasgaich, bha Lewis MacChoinnich bhon gnìomhachas ‘Fish n trips’ agus Tormod MacChoinnich bhon Outer Hebrides Fisheries Trust. Bha latha brèagha leis a’ ghrian a’ deàrrsadh agus fhuair a h-uile duine cothrom air a’ bhàta a stiùireadh agus ionnsachadh mu obair aig mur. Rug Morgan air breac agus chaidh crùbagan gu leòr fhaighinn sna clèibh a thog sinn! Bha là math fhèin againn agus bhiodh e math seo fheuchainn a rithist!

Diciadain – Air an darna là fhuair sinn air beagan còcaireachd fheuchainn. Dh’ionnsaich sinn reasabaidh ùr malteser crunch krispies agus chruthaich sinn piotsa an duine airson ar lòn an là sin! ’S e a bha blasta! Còmhla ris am bèicearachd, bha quiz doirbh againn. Ag obair ann am buidhnean, às dèidh trì cuairtean bhuannaich aon sgioba le aon phuing a bharrachd!

Diardaoin – Bha sinn anns an talla agus bha bùth-obrach dealbhadh ’s cruthachadh againn còmhla ri Alison Nicleòid bho Tiger Textiles. Chunnaic sinn na diofar seòrsa rùdan a bhios Alison a’ dèanamh le peanta agus rinn sinn fhìn measgachadh de bhaganan le dealbh orra a chruthaich sinn fhìn. Às dèidh lòn bha sinn ag obair le peanta a rithist agus rinn sinn soidhnichean airson dorsan agus rudan cruthachail eile! Thàinig Aileag bhon a’ BhBC a chèilidh oirnn airson ceistean a chuir oirnn mun t-seachdain. Dh’innis sinn dhaibh gu robh seachdain mhath againn agus gu robh e air còrdadh rinn uile.

Dihaoine - An là mu dheireadh de Bhrag agus chaidh sinn a Steòrnabhagh far an d’ fhuair sinn cothrom measgachadh de rudan fheuchainn mar putting, crazy golf, tennis agus roller blading. Thug e greis mus d’fhuair feadhainn air an casan leis na roller blades ach bha spòrs againn a bhith feuchainn! Às dèidh seo chaidh sinn chun tràigh ann an Nis airson beagan fois agus chrìochnaich sinn an t-seachdain le BBQ a bha uabhasach math le Agnes Rennie os cionn an teine!!

Chòrd an t-seachdain ris a’ chlann agus tha iad air leth taingeil dhan h-uile duine a chuidich le cuisean rè na seachdain.

Chaidh an t-seachdain, “Brag” a chuir air dòigh le Iomairt Ghàidhlig Iar Thuath Leòdhais agus chaidh na cosgaisean am pàigheadh le Comunn na Gàidhlig agus Bòrd na Gàidhlig.

Cuairt Iomairt Ghàidhlig Dhùn Èideann gu Glaschu

2011-06-27T10:36:00.007+01:00

Bho chionn ghoirid, chaidh 6 de Ghàidheil Dhùn Èideann air chuairt gu Ionad Gàidhlig Ghlaschu air Sràid Achadh a’ Mhansa agus, an sin, choinnich iad ri còrr is 30 bho choimhearsnachd Ghàidhlig a’ bhaile. Bha seo air a chur air adhart tro Iomairtean Gàidhlig Ghlaschu is Dhùn Èideann agus luchd-obrach bho Iomairt Ghlaschu a’ frithealadh gu còir air na thadhail.
Tha na thàinig à Dùn Èideann mar chuid de bhuidheann a bhitheas a’ coinneachadh gach madainn Diluain, ann an Caffè Nero ann am bùth ‘Fraser’s’ Sràid a’ Phrionnsa, airson còmhradh Gàidhlig agus cofaidh.

A bharrachd air eòlas a chur air cuid de Ghàidheil a’ bhaile fhèin, choinnich Gàidheil Dhùn Èideann ri luchd-obrach bho Chomunn na Gàidhlig, An Lòchran, Bòrd na Gàidhlig, Comhairle nan Leabhraichean, Comhairle Baile Ghlaschu agus cuideachd ri Cathraiche Iomairt Ghàidhlig Ghlaschu, Brus Whyte. Bha Cathraiche Iomairt Ghàidhlig Dùn Èideann, Ceitidh Mhoireach, cuideachd an làthair.

Le tachartas mar seo a chur air adhart, bhathar an dòchas ceanglaichean nas treasa a chruthachadh eadar na coimhearsnachdan agus na h-Iomairtean agus tha coltas gun do thachair sin gu ìre mar-thà – oir, le mar a chòrd an gnothach ri gach aon, tha Iomairt Ghàidhlig Ghlaschu a-nis a’ beachdachadh air cuairt a ghabhail a choimhead nan càirdean ùra aca, ann an Dùn Èideann!

A' cur fàilte air òigridh Èireanneach

2011-06-24T11:56:00.007+01:00

Thadhail buidheann òigridh à Ògras an Chaistil air Ìle 17 Ògmhios. Ràinig iad ann am Port Ilein à Baile a' Chaisteil 's iad airson deireadh-sheachdain de spòrs agus cultar. Cha robh a' mhuir cho ciùin idir ach rinn iad an gnothach 's fhuair iad fàilte chridheil aig Ostail Òigridh Phort Sgioba.

Chruinnich a' bhuidheann le òigridh Ìle airson geama iomainn a chluich aig a' Phort Mhòr. Madainn Disathairne bha turas ann gu Fionn Lagain far an tug Dòmhnall MacPhaidein beagan fiosrachaidh 's eachdraidh dhaibh ann an deagh Ghàidhlig Ìleach. Chòrd seo ris a h-uile duine agus bha spòrs ann a bhith cluich anns na tobhtaichean.

Às dèidh sin, chaidh iad dhan sgìre ghlèidhteachais aig an RSPB aig Gruinneart far an do chuir Eoin MacIlleDhuinn fàilte bhlàth orra le BBQ às leth Comann nam Pàrant Ìle.

Chòrd an dà latha ris a h-uile duine agus thathar ag amas air turas a Bhaile a' Chaisteil nas fhaide air adhart am bliadhana. Tha e math cairdeas ùr a thogail!

Fhuair an turas seo taic bho Iomairt Ghàidhlig Ìle 's Dhiùra agus Comann nam Pàrant le taic-airgid bho Cholmcille agus Bòrd na Gàidhlig. Taing mhòr dhaibhsan a chuir taic ris an tachartas gu sònraichte Naill Oliver agus Port Mòr airson an raon cluiche aca. Tuilleadh fiosrachaidh bho lynn@ile-diura.org.

Sradagan Ghlaschu air Cuairt

2011-06-10T10:54:00.002+01:00

Le deireadh an teirm a teannachadh chaidh buill Sradagan Ghlaschu air turas a-raoir far an robh iad a bòbhladh. Bha mu 50 aca ann le luchd-stiùiridh is pàrantan agus abair gun do chòrd a chùis riutha!
Feumar taing a thoirt don comataidh agus luchd-stiùiridh a tha ag obair gus am buidheann ruith cho math fad na bliadhna. Le àireamh sgoilearan Sgoil Ghàidhlig Ghlaschu fhathast ag èiridh tha sinn 'n dùil gum bi Sradagan Ghlaschu nas motha a-rithist san teirm ùr!

Tiugainn a Dhannsa 2011

2011-05-24T11:03:00.006+01:00

Chaidh Tiugainn a Dhannsa 2011 a chumail ann an Talla Naoimh Pheadair ann an Dalabrog air a' 14mh latha dhen Chèitean. 'S i Lena NicIllFhialain bho Chlub Dannsa Naoimh Pheadair a chuir an oidhche air dòigh, ann an com-pàirteachas le Iomairt Ghàidhlig Uibhist a Deas agus Èirisgeigh. Ghabh còig cuplaichean pàirt anns an fharpais am-bliadhna agus bha aca ri sia dannsaichean a dhèanamh air beulaibh nam britheamhan - Eòghann MacLachlainn agus Jayne NicLeòid.

Chluich Na Deasaich airson nan dannsaichean agus bha òrain, pìobaireachd agus dannsa a' dol tron oidhche airson cothrom a thoirt dha na farpaisich an anail a tharraing. Ghabh Còisir Sgoil Dhalabroig òrain dhuinn le taic bhon stiùiriche Penny Burgess agus bha taisbeanadh goirid ann dhen Haymakers Jig leis an òigridh a ghabh pàirt anns na clasaichean dannsa tro mheadhan na Gàidhlig.

Bha obair dhuilich aig na britheamhan, ach às dèidh nan sia dannsaichean 's e Margaret Walker agus Hugh MacCormick a bha anns a' chiad àite am-bliadhna a-rithist. Tha sinn airson taing a thoirt dhan a h-uile duine a thug taic dhuinn airson an oidhche seo a dhèanamh cho soirbheachail.

Latha na Gàidhlig

2011-05-24T10:41:00.009+01:00

Chaidh Latha na Gàidhlig a chur air dòigh le Iomairt Ghàidhlig Uibhist a Deas agus Èirisgeigh agus chaidh a chumail ann an Sgoil an Ìochdair air an 21mh latha dhen Ghiblean. Thàinig 75 sgoilear bho air feadh Uibhist, a bhios air an oideachadh tro mheadhan na Gàidhlig, còmhla airson pàirt a ghabhail ann am bùithtean-obrach tro mheadhan na Gàidhlig.

Bha an latha fosgailte do sgoilearan ann an clas 4 gu clas 7 agus 's iad na bùithtean-obrach anns an robh iad an sàs: Dannsa, Còcaireachd, Geamannan, Tae Kwon Do agus Dràma. Bha na sgoilearan measgaichte le sgoilearan bho na sgoiltean eile agus fhuair iad ceithir a-mach às na còig bùithtean-obrach a fhrithealadh. Dh'innis iad anns a' mheasadh aca gun do chòrd an latha agus na bùithtean-obrach riutha agus cuideachd gun robh e math tighinn còmhla le sgoilearan bho sgoiltean eile airson tachartas tro mheadhan na Gàidhlig.

Tha an Iomairt airson taing a thoirt do Sgoil an Ìochdair airson an taic leis an latha seo, dha na sgoiltean airson frithealadh agus cuideachd dha luchd-teagaisg nam bùithtean-obrach.

Cumhnant Gàidhlig Asainte

2011-05-23T14:21:00.004+01:00

Tha e na adhbhar toileachais dhuinn gu bheil Còmhlan Gàidhlig Asainte a' cur air dòigh "Cumhnant Gàidhlig Asainte". 'S e pròiseact ionmholta a tha seo far am faigh muinntir an àite cothrom air taic-airgid airson ionnsachadh Gàidhlig. Gheibh iad na cìsean aca a phàigheadh airson clàsaichean Ùlpan agus tachartasan mar na cùrsaichean aig SMO no Rubha an Fhithich ann an Leòdhas.

Mu choinneimh an taic seo, thathar an dùil gun cuir luchd-ionnsachaidh rudeigin air ais dhan choimhearsnachd, clasaichean, cur-seachadan no eile. Gum bith bun-stèidhe ann an Asainte às dèidh seo agus gun tèid togail air.

Tha CnaG air taic mòr a thoirt don choimhearsnachd leis a' phròiseact seo. A bharrachd air taic-airgid, tha sinn air taic a thoirt dhaibh le structaran, taic-airgid bho bhuidhnean eile agus mar a chuireas iad an gnìomh am pròiseact. Bha co-obrachadh a dhìth le diofar dhaoine 's bhuidhnean aig gach ìre.

Tuilleadh Fiosrachaidh bho Sheumas Greaumach air 07919 242 639

Tachartas Dràma aig Ceann Loch Iall

2011-04-01T09:31:00.004+01:00

Chuir Iomairt Ghàidhlig Loch Abair tachartas Dràma air dòigh do dh'òigridh eadar S1-S3. Thàinig òigridh còmhla à tri àrd-sgoiltean sa sgìre, Loch Abair, Àird nam Murchan agus Malaig, agus chuir iad seachad dà latha ag obair air sgilean dràma tro mheadhan na Gàidhlig.

Dh'fhuirich sinn aig Ionad Cheann Loch Iall a bha math agus bha sinn a' còcaireachd dhuinn fhèin. Fhuair a h-uile duine cothrom pàirt a ghabhail agus ghabh sinn ar dineir de spaghetti agus macaroni a bha air leth blasda. Taing mhòr airson biadh cho math.

Duais na Gàidhlig

2011-03-09T14:08:00.006Z

Tha an Iomairt ann an Uibhist a Deas agus Èirisgeigh air duaisean a thoirt seachad dhan na bun-sgoiltean anns an sgìre. Tha na trì sgoiltean an sàs agus chaidh duais a thoirt seachad airson a h-uile rùm sgoile a tha a’ teagasg Gàidhlig.
Bidh aon neach air an taghadh gach seachdain airson an oidhirp a tha iad air a dhèanamh agus bidh iad a’ toirt an duais dhachaigh aig an deireadh sheachdain. Tha an duais ag ràdh “Airson dìcheall ann am bruidhinn na Gàidhlig.”
Chithear Allana Beaton a tha ann an Clas 3 ann an Sgoil an Iochdair anns an dealbh seo leis an duais.

Cupa na Cloinne

2011-02-01T10:14:00.002Z

Chaidh an dàrna fharpais ball-coise agus Iomairt Ghàidhlig Uibhist a Deas agus Èirisgeigh a chumail air Diardaoin 20mh den Fhaoilleach ann an Sgoil Lionacleit.

Thàinig 4 sgioba a-mach le 21 duine-cloinne a’ gabhail pàirt gu lèir.

Bha an fharpais gu math faisg ach ’s e sgioba a Sgoil Dhalabrog a’ rinn an gnothach aig deireadh, le sgioba bho Sgoil Èirisgeigh anns an darna àite.

Bha an fharpais air a chumail tro mheadhain na Gàidhlig ged nach fheumadh a chlann a bhith ann an foghlam tro meadhain na Gàidhlig.

Feumar taing a thoirt do na tidsearan agus na pàrantan a thàinig a-mach leis an òigridh agus do Shona NicAoidh a thug taic seachad air an oidhche.

Compiutair a' bruidhinn air CnaG

2011-01-25T16:48:00.005Z

Tha e math beagan sanasachd fhaighinn ach tha an compiutair seo fhathast ag ionnsachadh.....

Bùithtean-obrach le Artair Donald

2011-01-24T12:57:00.001Z

Fhuair clann fo aois sgoile agus bun-sgoile an sgìre Iomairt cothrom pàirt a ghabhail ann am bùithtean-obrach le Artair Donald anns an Dùbhlachd 2010. Thadhail Artair air buidheann òigridh ann an Dalabrog agus cuideachd air Sgoil-àraich Dhalabrog, Cothrom Òg, agus am buidheann pàrant is pàiste ùr anns an sgìre. Ghabh suas ri 40 duine-cloinne pàirt anns na bùithtean-obrach seo. Rinn Artair tòrr rudan spòrsail tro mheadhan na Gàidhlig agus chòrd na rinn e gu mòr ris a h-uile duine a ghabh pàirt.

Làrach-lìn ùr le Gàidhlig air

2011-01-19T16:39:00.003Z

Tha sinn a' cur fàilte air an làrach-lìn ur aig Ionad-sgithidh Ghlinn Sìth far a bheil iad air oidhirp mhòr a dhèanamh le Gàidhlig.

Bidh cuimhne agaibh gun deach ionadan sgìthidh na h-Alba air adhart le soidhnichean dà-chànanach trath ann an 2009. Rinn CnaG rannsachadh neo-fhoirmeil air beachdan an t-sluaigh a sheall a' mhòr-chuid, 69%, a' cur taic riutha. Bhon uairsin tha sinn toilichte obair eile a thoirt air adhart leotha.

Bha e na urram a bhith obrachadh leis an Dtr Adhamh Watson Mac Bhatair a tha na eòlach air a' Mhonaidh Ruaidh agus sgìre Ghlinn Sìth. Thug e taic mhòr dhuinn le beachdan air ainmean-àite. Chìthear an làrach-lìn an seo: http://www.ski-glenshee.com/

Ionad Gàidhlig Inbhir Nis

2011-01-18T10:41:00.007Z

Tha Fòram Gàidhlig Inbhir Nis air iarrtas cead-dealbhaidh a chur a-steach. Tha iad ag amas air mòr-ionad a thogail a bhios a' toirt na buidhnean Gàidhlig air fad còmhla agus ionad cùram chloinne a stèidheachadh. Bidh goireasan airson na coimhearsnachd rim faighinn cuideachd.

Tha altaire air planaichean mionaideach a chur ri chèile leis an dealbh gu h-àrd.

Bidh a' bhuidheann a-nis ag obair air plana-gnìomhachais agus siostam airson airgead a thogail. Thathar ag amas air an ionad fhosgladh ann an 2013.

Ionad Gàidhlig Ghlaschu

2010-12-16T13:01:00.004Z

Tha Comunn na Gàidhlig glè thoilichte gu bheil an obair thogail an lùib An Lèanag - Ionad Gàidhlig Ghlaschu - cha mhòr deiseil. 'S e goireas air leth a bhios ann do choimhearsnachd Ghàidhlig Ghlaschu agus gu dearbh do dh'Alba air fad. Bidh luchd-obrach ChnaG agus buidhnean Gàidhlig eile stèidhichte anns An Lèanag.

Cumaibh sùil air làraichean-lìn Chomunn na Gàidhlig agus Bhòrd na Gàidhlig 'son barrachd mun seo sna seachdainean a tha romhainn.

Colm MacCuain

2010-12-14T09:56:00.002Z

Tha Iomairt Ghàidhlig Uibhist a Deas agus Èirisgeigh airson taing a thoirt do Cholm MacCuain a chuir ùine seachad ann an Uibhist a Deas.

Bha Colm deònach taic a thoirt don Iomairt le diofar rudan anns an robh an Iomairt an sàs agus rinn e tòrr obair saor-thoileach anns an sgìre fhèin.

Bha Colm an sàs ann an taic a thoirt do na pàrantan aig am buidheann pàrant is pàiste ùr ann an Uibhist a Deas, Clann Bheaga Bhrèagha agus thug an Iomairt tabhartas bheag do Cholm airson an obair ionmholta a’ rinn e.

Tha sinn air leth taingeil airson na rinn Colm agus an dòchas gun tèid gu math leis anns na tha roimhe.

Oidhche Cheist

2010-12-09T10:57:00.002Z

Chaidh oidhche Cheist a chumail air an 3mh den Dùbhlachd ann an Taigh-Òsta Loch Baghasdail, mar phàirt de Iomairt Ghàidhlig Uibhist a Deas agus Èirisgeigh.
Bha ceithir sgioban an sàs, agus chì sibh san dealbh an fheadhainn a bhuannaich, ainm an sgioba “Gun Ainm”.
Tha sinn airson taing a thoirt do Cholm MacCuain a thug taic seachad leis nan ceistean a chuir air dòigh agus an leughadh air an oidhche. Fhuair e lethbhreac de cheistean a chleachd Iomairt Ghàidhlig Ghlaschu anns am farpais cheist acasan.
Thathar an dòchas gun tèid oidhche eile mar seo a chumail a dh’aithghearr.

17 deugaire a’ cur feum air bùthan-obrach Gàidhlig ann an Uibhist

2010-12-09T09:55:00.005Z

Air Dihaoine 29 agus Disathairne 30 Dàmhair fhuair sgoilearan ann an Àrd-sgoil Lìonacleit an cothrom measgachadh de chur-seachadan a ghabhail tro mheadhan na Gàidhlig airson na sgilean aca a leasachadh anns na h-ealain. Ghabh 17 sgoilear pàirt anns na bùthan-obrach a chaidh a chumail anns an sgoil fhèin.

Bha an tachartas air a ruith le Jenna Mhoireasdan aig Fèisean nan Gàidheal, Màiri Anna Chaimbeul aig Iomairt Ghàidhlig Uibhist a Deas agus Èirisgeigh agus Marion NicMhathain bho Bhuidheann Leasachaidh Òigridh Uibhist a Deas le Bòrd na Gàidhlig a’ cur taic-airgid mu choinneamh a’ phròiseact.

Thairis air an dà latha, a chaidh a chur air bhonn mar sgeama-dearbhaidh, fhuair compàirtichean dà thaghadh de na cuspairean a leanas; pìobaireachd, dannsa sràide, togail dhealbhan agus òrain Ghàidhlig, le òrain luaidh aig cridhe na clas.

B’ e Eòghainn MacEanraig, Sìneag Nic an t-Saoir, Ciorstaidh NicAnndrais agus Mòrag NicAonghais a chaidh fhastadh airson na clasaichean a ruith anns a’ Ghàidhlig. Bha clann gun Ghàidhlig air am brosnachadh gus faclan ùra ionnsachadh agus dh’ fhàs a’ chlann na bu dhàna Gàidhlig a bhruidhinn fhad 's a bha an tachartas a’ dol air adhart. Dh’obraich a’ chlann agus an luchd-teagaisg gu èifeachdach còmhla rè nan clasaichean gu lèir. Air feasgar Disathairne rinn gach clas taisbeanadh goirid airson sealltainn dha càch na dh’ionnsaich iad thairis air an dà latha.

Eadar theangachadh mar-aon

2010-10-22T13:40:00.005+01:00

Bha Comunn na Gàidhlig air leth toilichte seirbheis eadar-theangachaidh mar-aon a thoirt seachad aig tachartas mu dheidhinn leabhair ùr Mhaoilis Caimbeul – TEAS - mar phàirt den sgeama ‘Gàidhlig @ Oilthigh Ghlaschu’. Air sgàth an eadar-theangachadh b’ urrainn do dhaoine nach robh fileanta sa Ghàidhlig a bhith an sàs agus cha robh aig an oilthigh ri an tachartas a dhèanamh gu dà-chànanach.
Tuilleadh fiosrachaidh mun ghoireasan eadar-theangachaidh againn an seo.

Seiseanan Cluich

2010-10-21T12:03:00.002+01:00

Chaidh seiseanan cluich do chlann a chumail ann an Èirisgeigh, Dalabrog agus san Ìochdar tro làithean-saora na Dàmhair. Bha 25 duine cloinne an làthair eadar na trì làithean agus fhuair iad an cothrom tòrr gheamaichean spòrsail a chluich. Ged a bha na seiseanan air an cumail tro mheadhan na Gàidhlig, bha iad cuideachd fosgailte do chlann gun Ghàidhlig. Chaidh seisean fa leth a chumail do chlann a tha a’ frithealadh buidheann Sradagan anns an sgìre.
Bha an tachartas seo air a ruith le Iomairt Ghàidhlig Uibhist a Deas agus Èirisigeigh ann an com-pàirteachas le Buidheann Leasachaidh a’ Chinn a Deas agus tha sinn airson taing a thoirt do Chlaire Scott bhon Ionad Saor-thoileach, a thug taic dhuinn le seisean an Ìochdair air an Diluain.

Iomairt Ghàidhlig Ìle 's Dhiùra

2010-10-20T16:05:00.004+01:00

Chaidh coinneamh den bhuidheann-stiùiridh aig Iomairt Ghàidhlig Ìle 's Dhiùra a chumail ann an Ìle Diluain. Chaidh an Iomairt seo a stèidheachadh am bliadhna 's oifigear pàirt-ùine ag obair a-mach à Ionad Chaluim Chille Ìle.

Aig an ìre seo tha an Iomairt a' cur an gnìomh diofar phroiseactan nam measg Sgeama Comhairlichaidh nam Pàrant far a bheil pàrantan a' brosnachadh phàrantan eile gus an cuid cloinne a chur dhan ionad Gàidhlig. Air sgath 's an oidhirp a chaidh a dhèanamh ann an Ìle bho chionn ghoirid, tha co-dhiù trì a bharrachd teaghlaichean a' beachdachadh air foghlam Gàidhlig ann am Bogh Mòr.

Tha an Iomairt cuideachd ag obair le Bun-sgoil Dhiùra, ICCI agus an Cyber Cafaidh ann am Port Ilein gus diofar thachartasan a chur air dòigh.

Ma tha thu ann an Ìle, 's dòcha a' coimhead air Solais Loch an Dàil, chì thu na soidhnichean ùra a tha Comhairle Earra Ghàidheal 's Bhòid a' cur suas. Tha seo air sgath 's am poileasaidh dà-chànanach aca tha dìreach air toiseachadh.

Dealbh snog

2010-10-07T15:12:00.004+01:00

Fhuair sinn an dealbh seo bho VisitScotland agus chaidh a thogail le Steve McKenna Taing mhòr do Steve.

Tha sinn mar tha a' faighinn iarrtasan airson an sgeama soidhnichean dà-chànanach againn a' dearbhadh gu bheil an iarrtas aig ìre àrd a-rithist. Diofar adhbharan airson seo ach tha sinn cinnteach gu bheil barrachd 's barrachd spèis aig daoine dhan chànan.

Na Geamaichean Gàidhealach

2010-10-05T10:32:00.004+01:00

Chaidh Latha nan Geamaichean Gàidhealach airson clann anns a’ bhun-sgoil a chumail aig Sgoil an Ìochdair Disathairne an 18mh latha dhen t-Sultain. Bha an tachartas seo air a ruith le Iomairt Ghàidhlig Uibhist a Deas agus Èirisgeigh ann an com-pàirteachas le Buidheann Leasachaidh a’ Chinn a Deas. Bha 41 duine cloinne an làthair, bho Sgoil Dhalabroig, Sgoil an Ìochdair agus Sgoil Bhaile a’ Mhanaich, agus fhuair iad an cothrom feuchainn air diofar rudan spòrsail leithid tilgeil a’ chabair. Ged as e tachartas tro mheadhan na Gàidhlig a bh’ ann, bha e cuideachd fosgailte do chlann gun Ghàidhlig.

Chòrd an latha leis a h-uile duine a bha an sàs agus chaidh a’ chlann dhachaigh toilichte le bonn nan cois. Bha duaisean fa leth ann cuideachd dhan fheadhainn leis na puingean as àirde anns gach roinn agus chithear iad sin anns an dealbh seo.

Tha sinn airson taing a thoirt do Active Schools, do Chlaire Scott bhon Ionad Saor-thoileach, agus dhan a h-uile duine eile a thàinig gu saor-thoileach airson cuideachadh a thoirt dhuinn.

Fàilte bhlath ann am Muileann-Gaidh

2010-09-30T10:48:00.004+01:00

Tha Muileann-Gaidh air iomall Ghlaschu far a bheil Slighe Taobh Siar na Gàidhealtachd a' toiseachadh. Tha am baile a' fàs ach fhathast a' cumail coltas an àite mar a bha. Bho chionn bhliadhnaichean bhiodh tramaichean à Glaschu a' frithealadh a' bhaile agus ann an ùine nach bi fada gheibhear an trèana à seo a Dhùn Èideann nuair a thèid an loidhne-rèile ùr fhosgladh eadar Bathgate agus Àrdruigh.

A' coiseachd bhon stèisean gu meadhan a' bhaile chìthear an Crosskeys Inn agus tha an t-àite seo air beagan Gàidhlig a chur air na soidhnichean aca. Ged nach eil e buileach ceart, 's math gu bheil iad air oidhirp a dhèanamh agus bidh sinn a' sgrìobhadh thuca le tuilleadh fiosrachaidh. A-staigh tha Beannachd leibh sgrìobhte cuideachd agus a-rèir coltais bidh tòrr a' foighneachd air fuaimneachadh.

Am Mòd Nàiseanta Rìoghail 2010

2010-09-24T15:02:00.010+01:00

Bha 'deagh ghleus air a' phìob' a-raoir aig an Taigh-Òsta Nàiseanta ann an Inbhir Pheofharain, is Còisir Ghàidhlig Inbhir Pheofharain a' cumail na Cèilidh Bliadhnail aca. Tha an còisir an dràsta glè thrang a' deasachadh airson a' Mhòid Nàiseanta Rìoghail, a thòiseachais cola-deug an diugh.
Am bliadhna Bidh am Mòd ann an Gallaibh. Tha comataidh ionadail Mòd Ghallaibh air a bhith ag obair cruaidh fad na bliadhna agus bidh fàilte bhlàth a' feitheamh air farpaisich agus luchd-tadhail.

Spòrs-Sneachda na h-Alba

2010-09-22T14:58:00.003+01:00

Tha Spòrs-Sneachda na h-Alba air a dhol air adhart le peiteagan dà-chànanach airson nam farpaisean aca. Chìthear fiosrachadh an seo

Bho seo a-mach bidh a' bhuidheann a' cleachdadh nam peiteagan seo suas air na monaidhean agus cuideachd anns na farpaisean a ghabhas àite a-staigh agus air bruach tioram. Tha sinn toilichte taic a thoirt dhaibh.

A' bruidhinn air spòrs-sneachda, tha an iris "Fall-Line Skiing", (Sgitheadh Loidhne-tuiteim?????), air Alba a chur air a' phrìomh dhuileag aca 's a' sanasachd cho math 's bha an sneachda trath ann an 2010. Seo dealbh co-cheangailte ris an artacal.

Gluasad Cànain san Aghaidh Mhòr

2010-09-20T16:20:00.002+01:00

Tha sinn an sàs ann an leasachadh cànain, a’ feuchainn ri taic a thoirt do choimhearsnachdan, daoine ‘s buidhnean gus am faigh iad air Gàidhlig a chleachdadh no a thoirt a-steach ann an diofar dhòighean. Tric tha seo a’ ciallachadh gu bheil sinn a’ cruthachadh shuidheachaidhean far an tèid goireas no taic a thoirt seachad agus na goireasan sin an uairsin ann airson na coimhearsnachd san àm ri teachd.

Tha sinn ag amas air gluasad cànain – gum bi tuilleadh dhaoine ann le comas labhairt ann an Gàidhlig agus tuilleadh dhaoine a tha dà-chànanach ‘s na sgilean aca a tha an cois dà-chànanas. Ach mar a tha fios againn, tha gluasadan cànain a’ tachairt ann an dòighean eile. Tha ainmean-àite nan eisimpleir air seo.

San Aghaidh Mhòr tha dà eisimpleir air gluasad cànain a tha nan comharra air an t-suidheachadh san fharsaingeachd. Tha an teirm Spey Valley a’ fàs nas cumanta an àite Srath Spè. ‘S dòcha gu bheil e nas fhasa a thuigsinn airson luchd-turais no gu bheil ìomhaigh caran ameriganach air Vis-a-vis Scott Valley, Owens Valley, Yosemite Valley etc anns Na Stàitean. Ach ghabh na h-ainmean fuadain seo àite ainmean nan tùsanach.

Ged a tha cruaidh fheum air taigheadas ann an Srath Spè, chan eil feum air ainmean-àite ùra nuair a tha feadhainn ann mar tha. Chan e ainm ceart a tha ann an High Burnside, dìreach ainm fuadain a tha companaidh taigheadais a’ toirt air pìos talmhainn a tha bàn an dràsta. Dè tha ceàrr leis an ainm a th’ ann mar tha? Tha An Droighinn a’ mìneachadh coltas an àite glè mhath.

Ach dè thachras nuair a thig e gu poileasaidh dà-chànanach Chomhairle na Gàidhealtachd? Bidh a’ Ghàidhlig air High Burnside a dhìth orra ‘s mar sin cuiridh Àirde an Uillt às dhan Droighinn.....

Cha bhòrd bòrd gun aran...

2010-08-27T10:04:00.005+01:00

...ach 's bòrd aran leis fhèin. Deagh shean fhacal - tha eòlas gu leòr againn air aran a-staigh oifis Inbhir Nis far am bi sinn a' gabhail tost gu math tric. Chì tòrr dhaoine am bhan seo air feadh na Gàidhealtachd agus an companaidh, Taigh-fuine Ullapuil, air a dhol air adhart le teacsa dà-chànanach.

Fhuair iad taic bho ChnaG tron sgeama againn, air a mhaoineachadh le Iomairt na Gàidhealtachd 's nan Eilean. Tha beagan obair an sàs a h-uile iarrtas oir tric bidh daoine a' foighneachd airson abairtean 's teirmichean a tha ùr ann am Beurla no dìreach a' fàs cumanta ach nach eil an leithid, cumanta co-dhiù, againn ann an Gàidhlig.

Tha e a' ciallachadh co-obrachadh le diofar bhuidhnean far a bheil eòlas air cainnt no eadar-theangachadh agus tha sinn a' toirt ar taing dhaibh.

Biadh fad an là

2010-08-24T12:06:00.003+01:00

Dh'fhaodadh tu a ràdh gu bheil cultar cafaidh beòthail san Aghaidh Mhòr 's iomadach àitean far am faigh thu cèicean 's biadh fallain eile. Tha an Active Cafaidh air a dhol air adhart le soidhnichean dà-chànanach sa bhaile 's iad a' chiad àite, cho fad 's a tha fios againn, a tha air seo a dhèanamh. Bhitheamaid a' brosnachadh companaidh sam bith eile.

Tha cuideachd iomairt ann airson ionad Gàidhlig a stèidheachadh sa bhun-sgoil ùr a thèid a thogail san Aghaidh Mhòr agus tha CnaG a' cur ar làn taic ri seo. Aig an ìre seo ged tha chan eil e idir soilleir am bi ionad ann oir tha ceist mhòr air tidsearan mar as àbhaist agus goireasan. Chan e rud ùr a tha sin ach leis na buannachdan follaiseach le foghlam dà-chànanach 's fhiach strì a dhèanamh airson na Gàidhlig sa sgìre chudromach seo.

Stòr-data Ainmean-Àite na h-Alba

2010-08-20T10:35:00.002+01:00

Chaidh Stòr-data de dh'Ainmean-àite Albannach a chur air dòigh an de ann an Inbhir Nis. 'S e seo a' chiad cheum a dh'ionnsaigh Clàr-àite Naiseanta airson ainmean-àite Gàidhlig agus tha còrr 's mìle ainmean-àite sa stòr-data aig an ìre seo.

Tha goireasan air leth co-cheangailte ris an Stòr-data leithid mapaichean an latha an diugh agus seann mhapaichean. A bharrachd, tha ceanglaichean ann do thùsan aig diofar bhuidhnean leithid Leabharlann Nàiseanta na h-Alba.

Thathar a' sìor chur ris a' ghoireas seo agus tha a' mhòr-chuid de dh'ainmean co-cheangailte ri leasachaidhean eile mar shoidhnichean dà-chànanach air rathaidean.

Cleachd an goireas!

Steigearan càr IGG

2010-08-19T14:45:00.003+01:00

Tha Iomairt Ghàidhlig Ghlaschu air steigearan càr a dhèanamh gus an Iomairt a shanasachd. Ma bhios sib' fhèin ag iarraidh fear leigibh fios tron làrach-lìn aca agus is cinnteach gum faic sinn na steigearan tric sa bhaile sna seachdainean a tha romhainn.

Rudan beaga siud 's seo

2010-08-18T10:11:00.011+01:00

Bidh oifigearan ChnaG a' siubhal air feadh na dùthcha mar phàirt den obair 's sinne fortunach le seo oir tha sinn a' faicinn Alba ann an diofar dhòighean inntinneach 's eile. Tha e cuideachd math oir tha oifigearan ChnaG ag obair aig ìre choimhearsnachd a' cur an gnìomh proiseactan a bheireas taic dhan chànan.

A' siubhal air an trèana chunnaic sinn soidhnichean ùra air na stèiseanan rèile ann an sgìre Ghlaschu. Tha Transport Scotland air obair mhath a dhèanamh an seo tha e na thoileachas dhuinn gun robh CnaG an sàs le seo aig a' chiad cheum a' coiteachadh airson barrachd Gàidhlig.

Bidh sibh air stoidhle ùr fhaicinn air cuid de na treanaichean fhèin le Rèile na h-Alba a' nochdadh a-nis mar rud àbhaisteach. Tha pìos ri dhol fhathast an taca ris a' Chuimrigh far a bheil Arriva Trains Wales a' dèanamh tòrr a bharrachd sa chànan leithid clàran-ama 's làrach-lìn dà-chànanach. Chan eil sinn a' faicinn adhbhar nach dèan Scotrail an aon rud. Tha ùidh mhòr aig daoine ann an ainmean-àite agus tha rannsachadh a' dearbhadh seo ann an raointean eile. Le teicneòlas an latha an diugh, gabhaidh siostam dà-chànanach a chruthachadh gu simplidh.

Gu mì-fhortanach cha bhi a h-uile trèana a' ruith a-rèir a' chlàir-ama agus chuir sinn seachad uair a thìde ann am Peairt, rud nach eil cho dona. Tha beagan Gàidhlig an seo cuideachd ga cleachdadh aig ìre choimeirsealta air an taigh-seinnse Greyfriars.
Bidh na sgeamaichean aig CnaG a' fosgladh a-rithist san Dàmhair agus cothrom aig companaidhean ann an Sgìre HIE airgead fhaighinn airson soidhnichean dà-chànanach.

Geamannan Inbhir Chèitein

2010-08-11T15:27:00.004+01:00

Bha Comunn na Gàidhlig toilichte taic a thoirt seachad do Chearcall Còmhraidh Fìobha aig na Geamannan Gàidhealach ann an Inbhir Chèitein Disathairne. Chaidh stuthan taisbeanaidh a thoirt seachad agus bha an t-oifigear aig Iomairt Ghàidhlig Dhùn Èideann an làthair. Bidh an t-oifigear seo ag obair faisg air an sgìre far an robh na geamannan. Bha ùidh mhòr ann am foghlam Gàidhlig, do chloinn agus do dh’inbhich. Tha sinn ’n dòchas gun tig piseach air na seirbheisean Gàidhlig a tha ri fhaighinn san sgìre ann an ùine nach bi fada.

Tàlant Gàidhlig Uibhist

2010-08-06T13:24:00.006+01:00

Chaidh am farpais Tàlant Gàidhlig Uibhist a chumail mar phàirt de Iomairt Ghàidhlig Uibhist a Deas agus Èirisgeigh.

’S e farpais tàlant a bha seo a bha fosgailte airson clann fo aois sgoile gu Clas 7. Bha 3 diofar roinn ann – fo aois sgoile, Clas 1-3 agus Clas 4-7.

Chaidh an fharpais a chumail aig Geamaichean a’ Chinn a Deas agus bha e fosgailte gu clann an sgìre agus clann a bha a-staigh air làithean-saora.

Bha Sìneag Nic an t-Saoir agus Stephen MacÌomhair againn nan britheamhan agus abair gun robh obair dhuilich aca tighinn gu co-dhùnadh aig deireadh an fharpais.

Ghabh suas ri 14 òigridh pàirt anns an fharpais agus an aon riaghailt a bha air an cuir romhpa ’s e gun fheumadh iad Gàidhlig a chleachdadh.

Chuala sinn grunn òrain bhrèagha agus gu math eadar-dhealaichte agus sgeulachdan èibhinn cuideachd.

Bha duais luach £15 ann airson gach roinn agus aig an deireadh ’s e Lucy Lindsay a bhuannaich am farpais airson clann fo aois sgoile, Floraidh & Ruaraidh Gray a bhuannaich airson Clas 1-3 agus Pòl Monk airson clann ann an Clas 4-7. Fhuair Pòl cuideachd an cothrom a dhol air àrd-ùrlar air an oidhche sin aig consart na geamaichean airson an sgeulachd aige aithris dhan luchd-èisteachd. Chòrd sinn riutha air fad gu mòr.

Bha farpais air leth ann agus chòrd e gu mòr ri Sìneag agus Stephen. Thuirt Sìneag “Bha a Ghàidhlig aca cho math agus bha e math cho deònach ’s a bha iad pàirt a ghabhail”

Chòrd e ri Stephen measgachadh de dh’òrain agus sgeulachdan a chluinntinn ann an Gàidhlig.

Cabhsair Èirisgeigh

2010-08-04T14:44:00.002+01:00

Chaidh pròiseact fhiolmadh a chumail fad dà latha ann an Èirisgeigh còmhla le feadhainn de òigridh a sgìre. Bha an latha seo a chuir air dòigh le Mòrag Stiùbhart aig Sealladh agus Iomairt Ghàidhlig Uibhist a Deas agus Èirisgeigh.

Bha sinn fortanach gun robh Donna Dhòmhnallach an làthair airson bùth-obrach a dhèanamh le feadhainn dhan bhuidheann air sgilean camara. Fhuair iad an cothrom a dhol a-mach agus beagan fhiolmadh a dhèanamh iad fhèin air seallaidhean a bhiodh feumail airson prògram mu dheidhinn a chabhsair.

Air an oidhche thàinig feadhainn eile dhan òigridh còmhla airson beachdachadh air dè a bhuaidh a tha a chabhsair air toirt air Èirisgeigh agus am beatha acasan.

Bha iad a’ beachdachadh air daoine a bhiodh math airson agallamhan agus rudan a bhiodh feumail ann am prògram mun chabhsair.

Air an ath latha fhuair Calum Dòmhnallach, fear às a bhuidheann, cothrom agallamhan a dhèanamh le feadhainn às an sgìre. Fhuair e comhairle air diofar rudan a tha feumail nuair a thathar a dèanamh agallamh airson prògram telebhisean.

Fhuair Calum cuideachd ceistean a chuir air a bhràthair Dòmhnall Iain airson a bheachd san fhaighinn air a chabhsair. Thug seo deagh chothrom do Dhòmhnall Iain a bhith air beulaibh a chamara.

Chaidh gu math leis nam bùithtean-obrach seo agus tha dòchas ann gum faigh am buidheann cothrom beagan gearradh fheuchainn a-rithist air na rinn iad ann an dà latha a bha seo.

Seachdain Spòrsail na h-òganaich

2010-08-03T13:54:00.009+01:00

Chaidh seachdain spòrsail na h-òganaich a chuir air dòigh le Marion Nic Mhathain aig Buidheann Leasachaidh a’ Chinn a Deas agus Màiri Anna Chaimbeul a tha na h-oifigear air Iomairt Ghàidhlig Uibhist a Deas agus Èirisgeigh.

Thàinig eadar 23 - 31 òigridh a-mach gach latha agus bha iad sin eadar 3 bliadhna agus 7 bliadhna a dh’aois. Bha òigridh ann bhon sgìre fhèin agus òigridh a bha a-staigh air an saor-làithean.

Bha sinn fortanach Caitlin NicAonghais fhaighinn airson stiùireadh a thoirt dhan òigridh fad na seachdain agus gun robh deagh bhuidheann de dhaoine againn airson cuideachadh a thoirt seachad cuideachd.

Ghabh an òigridh pàirt ann an mòran diofar rudan air feadh na seachdain agus bha an t-seachdain air a chumail tro mheadhain na Gàidhlig. Dh’ionnsaich iad tòrr òrain Ghàidhlig, geamaichean ùra agus fhuair iad cothrom tòrr peantadh a dhèanamh cuideachd (air lèine-t agus glainne). Chaidh sinn cuairt air a bhus dhan taigh tasgaidh Diardaoin agus fhuair iad cothrom sùil a ghabhail mun cuairt còmhla le Gillebride a bha ag obair an latha siud agus cuideachd a dhol dhan chafaidh airson greis. Air an latha mu dheireadh chuir a chlann cuirm beag air dòigh airson na teaghlaichean aca agus bha seo math fhèin. Chrìochnaich an t-seachdain le partaidh bheag dhan òigridh agus cupa tì agus bèicearachd dha na pàrantan. Bha cothrom aig na pàrantan bileag fiosrachaidh a thogail an seo mu dheidhinn foghlam tro mheadhain na Gàidhlig agus còmhradh a dhèanamh leis na pàrantan eile.

Chòrd an t-seachdain leis an òigridh air fad agus leis a h-uile duine a bha an sàs ann. Tha sinn airson taing a thoirt dhan h-uile duine a thug dhuinn taic ann an dòigh sam bith agus gu h-àraid do Chomunn na Gàidhlig airson an taic airgead tro Sgeama Ath-bheothachaidh Coimhearsnachd aig HIE.

Deagh àireamhan aig farpais cheist Ghlaschu

2010-07-22T13:21:00.006+01:00

Cha do chùm oidhche fhliuch, saor-làithean no àite ùr daoine air falbh a-raoir bhon fharpais cheist aig Iomairt Ghàidhlig Ghlaschu agus Meetup Ghàidhlig Ghlaschu. Bha ochd sgioban an sàs agus chì sibh san dealbh na fheadhainn a bhuannaich, ainm an sgioba ‘beò an dòchas’!
Tha sinn ’n dòchas ur faicinn aig an ath fharpais cheist; 18mh Lùnastal ann an Taigh-òsta a’ Phàirc aig 7:30f.

Trailab - Companaidh ùr a' cleachdadh na Gàidhlig

2010-07-16T11:59:00.008+01:00

Tha sinn air beagan taic a thoirt do chompanaidh ùr faisg air a' Ghearasdan. 'S iad Trailab a bhios a' ruith làithean-saora baidhcadh-beinne. Chì thu an làrach-lìn an seo: http://trailab.com/gd/

Tha an companaidh cuideachd gu bhith cleachdadh Fraingis agus san àm ri teachd, Cuimris. Tha e fìor mhath gu bheil gu bheil taic ann mar seo don Ghàidhlig.

Bidh na sgeamaichean aig CnaG a' fosgladh a-rithist san Dàmhair agus faodaidh companaidhean suas gu £2,000 fhaighinn mu choinneimh soidhnichean dà-chànanach. Cum sùil air ar làrach-lìn.

Iomairt Ghàidhlig Ìle 's Dhiùra

2010-07-15T17:31:00.020+01:00

Tha sinn air adhartas a dhèanamh ann an Ìle 's Diùra bho chionn ghoirid. Mar phàirt de chùmhnant Bhòrd na Gàidhlig, tha sinn a' toirt air adhart Iomairtean Gàidhlig. Tha iad stèidhichte air a' mhodail leasachaidh a thàinig bhon Chuimrigh 's iad gu math soirbheachail. Tha Iomairtean Gàidhlig aig ìre thràth fhathast ann an Alba ged a tha iad a' dèanamh adhartas. Ann an Ìle 's Diùra tha sinn dìreach às dèidh neach-obrach fhastadh a bhios stèidhichte aig Ionad Chaluim Chille Ìle, An t-Ionad a chaidh fhosgladh ann an 2002.

Coltach ris na h-Iomairtean eile, tha Iomairt Ghàidhlig Ìle 's Dhiùra ag amas air dà rud 1) fàs a thoirt air àireamh luchd-labhairt na Gàidhlig agus 2) cothroman a leudachadh gus Gàidhlig a chleachdadh. Le seo, tha na sgìrean a' comharrachadh phrìomhachasan airson na Gàidhlig aig ìre choimhearsnachd. Bidh iad eadar-dhealaichte a-rèir na diofar sgìrean agus deagh theans gu bheil diofarleasachaidhean a dhìth ann an Ìle 's Diùra. Aig an ìre seo, tha foghlam tro mheadhan na Gàidhlig tighinn a-mach aig ìre àrd mar phrìomhachais anns a h-uile sgìre.

Rinn Comann nam Pàrant beagan rannsachaidh bho chionn ghoirid air beachd mhuinntir Ìle air a' Ghàidhlig. Sheall seo gu math soilleir gu bheil daoine a' cur luach mhòr sa chànan agus gum bu toigh leotha piseach a thoirt air suidheachadh na Gàidhlig san Eilean.

Tha seo furasta a ràdh ach 's e rud eile a chur an gnìomh. Seo far a bheil Iomairt Ghàidhlig Ìle 's Dhiùra a' tighinn a-steach. Tha sinn air bruidhinn ri diofar dhaoine sa choimhearsnachd agus ann am buidhnean far a bheil buaidh air a' chànan. Chaidh tòrr obair a dhèanamh le Co-Roinn Ghàidhlig Ìle, Dhiùra 's Cholbhasa thar na bliadhnaichean agus chaidh aontachadh gun rachadh a' bhuidheann seo a chomharrachadh mar bhuidheann-stiùiridh na h-Iomairt. 'S e adhartas math a tha seo oir tha e a' ciallachadh gu bheil structar ann gus co-òrdanachadh a thoirt air leasachaidhean Gàidhlig san dà eilean.

Thèid na prìomhachasan a chomharrachadh thar na sia seachdainean a tha romhainn agus dreach phlana-obrach a chur ri chèile. Beachdaichidh a' bhuidheann-stiùiridh air na prìomhachasan 's am plana agus thèid a chur an gnìomh às dèidh an Lùnastail.

Chan eil staid na Gàidhlig a' seasamh leis fhèin ged tha, tha staid nan coimhearsnachd gu mòr ceangailte rithe. Ged a tha Ìle 's Diùra glè thrang an-dràsta le luchd-turais, tha leasachadh a dhìth air goireasan an Eilein mar rathaidean 's eile. Rudan mar obraichean, taighean 's eile, tha iad a' cur gu mòr ri misneachd coimhearsnachd agus glè chudromach. Tha sinn an dòchas gun tèid aig an Iomairt buaidh a thoirt air na nìthean seo fiù 's ann an dòigh beag.

An-dràsta chan eil ach an Isle of Arran a' frithealadh an Eilein 's an Hebridean Isles air falbh an àite a' Chlansman a tha briste le trioblaid leis a' chrankshaft ann an aon de na h-einseanan. Tha seo a' fàgail an Isle of Arran glè thrang agus tha e doirbh àite fhaighinn airson carbadan. Tha CMAL a' togail an MV Finlaggan sa Phòlan an-dràsta agus bidh i a' frithealadh an eilein aig an àm seo an ath-bhliadhna a' toirt piseach air an t-seirbheis.

Bidh fhios aig duine sam bith a tha eòlach air Ìle 's Diùra gu bheil pàirt mòr aig uisge-beatha ann an eaconamaidh an dà eilean. Saoil dè na cìsean a tha iad a' cur dhan dùthaich airson a' bhàt'-aiseig aca a chaidh a thogail ann an 1984?

Sgoil Draibhidh Gàidhlig

2010-07-02T13:26:00.004+01:00

Tha cothrom air leth ann do dhuine sam bith a tha ag ionnsachadh draibheadh 's aig a bheil Gàidhlig. Tha Sgoil Draibhidh Sheònaidh Park air a dhol air adhart le sgrìobhadh dà-chànanach air a' char aige.

Tha seo math ann an iomadach dòigh oir a bharrachd air cothrom a thoirt do luchd-labhairt Gàidhlig, tha an cànan fhèin a' faighinn sanasachd air feadh Inbhir Nis.

Tha sinn ro dheònach taic a chumail ri companaidhean eile a tha airson Gàidhlig a chleachdadh san dòigh seo agus bidh na sgeamaichean ùra againn a' fosgladh nas fhaide air adhart sa bhliadhna. Cum do shùil air làrach-lìn ChnaG.

Urras Foghlaim Gnothaichean Dùthchail

2010-06-30T14:13:00.005+01:00

Chuir sinn taic ris a' bhuidheann seo bho chionn ghorid le soidhnichean dà-chànanach. As dèidh sin, tha bùth ris an taobh cuideachd air a dhol air adhart le soidhnichean. Faisg air làimh tha Monadh Nibheis a chuir soidhnichean dà-chànanach suas an uiridh.

Tha an t-Urras a-nis a' beachdachadh air cùrsaichean tro mheadhan na Gàidhlig.

Ceum air cheum....

Fàilte air luchd-coiseachd

2010-06-23T11:24:00.005+01:00

Tha CnaG air taic a thoirt do bhuidheann "Fàilte air Luchd-Coiseachd" ann an Alba. Thàinig iad thugainn 's ag iarraidh taic le Gàidhlig. Tha sinn uabhasach toilichte gu bheil spèis aca dhan chànan 's gu bheil an samhla aca a' cur prìomhachas air a' Ghàidhlig.

Tha samhla dà-chànanach aca airson an dearbh sgeama sa Chuimrigh agus bha a' bhuidheann airson an aon chleachdadh a chur an gnìomh ann an Alba.

Beag air bheag tha diofar bhuidhnean a' comharrachadh na Gàidhlig mar rud prìseil do dh'Alba 's rudeigin a tha sònraichte mun dùthaich. 'S ann againne a tha i 's tha deònach taic a thoirt do bhuidheann sam bith a tha airson a cleachdadh.

Farpais cheist air leth eile ann an Glaschu

2010-06-17T13:54:00.002+01:00

Bha oidhche sgoinneil eile a-raoir aig farpais cheist ann an Glaschu air a chur air dòigh le Iomairt Ghàidhlig Ghlaschu agus Buidheann Coinnichidh Ghlaschu. Bha còrr is 40 daoine ann an 9 sgioban agus chì sibh an dealbh an seo den sgioba a rinn a chùis air càch.
Tha sinn ag amas air farpais cheist a dhèanamh an treas Diciadain gach mìos, san Iuchar ’s e sin an 21mh. Chì sinn ann sibh!

Ùlpan ann an Dùthaich MhicAoidh

2010-06-16T14:47:00.012+01:00

Tha oidhirpean ga dhèanamh an-dràsta an Dùthaich MhicAoidh gus clasaichean Ùlpan a thòiseachadh. An-dè, aig Taigh-òsta an Ruigh Chòinnich faisg air Ceann Lobh Biorbhaidh, chaidh latha 'blasad Ùlpan' a chumail agus fhuair 24 neach cothrom air Aonad 1 Ùlpan ionnsachadh. Bha dà sheisean ann tron latha agus fhuair an dà bhuidheann sealladh air dòigh teagaisg Ùlpan agus an stoidhle ionnsachaidh. Chòrd an latha leis a h-uile duine a bha an làthair agus thathar a nis an dòchas gun tòisich cùrsa Ùlpan san t-Sultain.

Oidhche Teaghlaich Ìochdair

2010-06-15T15:23:00.003+01:00

Chaidh Oidhche Theaghlaich a chumail ann an Sgoil an Ìochdair air Dihaoine 14mh den Cèitean. Chaidh an oidhche a chuir air dòigh le Mary Ann aig Iomairt Gàidhlig Uibhist a Deas is Èirisgeigh le taic bho Chomataidh Sradagan an Ìochdair. Thug an oidhche seo cothrom do òigridh an sgìre an tàlantan a shealltainn dhan a h-uile duine a bha an làthair. Chuala sinn òrain Gàidhlig air an seinn gu brèagha agus ceòl iongantach air a chluich air mòran ionnstramaidean eadar-dhealaichte. Bha cothrom aig daoine dannsa a dhèanamh le ceòl sgoinneil bho Ailig Dhòmhnallach. Chluich Pàdraig Moireasdan agus Ciaran Whittle deagh phuirt cuideachd airson na casan aig a h-uile duine a chumail a’ dol. Rinn Marissa agus Shona uabhasach math air an oidhche a chumail a’ dol agus bha e math nach robh facal beurla air a chluinntinn fad na h-oidhche!!

Bha farpais-cheist ann cuideachd ann an Gàidhlig agus ’s e an teaghlach Peutan a’ rinn an gnothach aig ag deireadh.

Chaidh bèicearachd blasta a thoirt a-steach le daoine bhon choimhearsnachd airson a ghabhail còmhla ris an tì.

’S e oidhche gu math neo-fhoirmeil a bha ann agus chòrd e ris a h-uile duine an bha ann. Bha raffle ann agus bha na t-airgead air a thogail airson buidheann Sradagan an Ìochdair

Clas Dannsa Traidiseanta

2010-06-15T15:19:00.003+01:00

Chaidh clasaichean dannsa traidiseanta a chumail tro mheadhain na Gàidhlig airson còig sheachdain ann an Dalabrog mar phàirt de Iomairt Ghàidhlig Uibhist a Deas agus Èirisgeigh.

’S e Lena Nic IllFhialain a bha a’ teagasg agus ghabh ochdnar pàirt anns na clasaichean a tha seo. Dh’ionnsaich iad dannsaichean mar Haymakers Jig agus Britannia Two-step.

Bha sianar a-mach às na h-ochd ann am foghlam tro mheadhain na Gàidhlig agus rinn iad deagh oidhirp Gàidhlig a chleachdadh. Fhuair an dithis òg eile cothrom èisteachd ri Gàidhlig agus bha tuigse aca air a mhòr-chuid ged nach robh na sgilean conaltraidh aca uaireannan airson freagairt air ais ann a’ Ghàidhlig. Chòrd na clasaichean leis an òigridh agus bha e math gun robh an cothrom aca Gàidhlig a chleachdadh taobh a-muigh na sgoile.

Thathar an dòchas tuilleadh clasaichean fheuchainn a-rithist nas anmoiche air a bhliadhna.

Ìochdar Thròndairnis a' cur fàilte air Ùlpan!

2010-06-15T11:32:00.003+01:00

Airson a’ chiad uair, chumar clas Ghàidhlig Ùlpan ann an Ìochdar Thròndairnis san t-Òg-mhìos. Bha Ionad Cholm Chille 1400 ann an Stafainn air leth freagarrach airson an leithid. Le oide Gilleasbuig Feargasdan air an stiùir, bha naoi oileanaich ag obair gu cruaidh thar trì làithean, ach bha spòrs na luib cuideachd. Chaidh a’ phròiseact a chuir air adhart le Lasair [Iomairt Ìochdar Thròndairnis], le taic bho Chomhairle na Gàidhealtachd, Bòrd na Gàidhlig agus Comunn na Gàidhlig.

Tha Lasair ann am compàirteachas le Colaiste Sabhal Mòr Ostaig gus cùrsaichean a bhuineas don Ghàidhlig agus cultar nan Gàidheal a bhrosnachadh ann an taobh tuath an Eilein Sgitheanaich. Mar Iomairt Chànain nàiseanta, tha Lasair a’ faotainn taic agus stiùireadh bho Bòrd na Gàidhlig agus Comunn na Gàidhlig. Airson fiosrachadh fhaighinn air na cùrsaichean a tha fainear, faodar brath a chuir gu sineg@cnag.org.uk no gu sm00sd@groupwise.uhi.ac.uk

Farpais cheist Gàidhlig ann an Glaschu

2010-05-20T12:34:00.001+01:00

Thachair a chiad farpais cheist Gàidhlig a-raoir a bh’ air a chur air dòigh le Iomairt Ghàidhlig Ghlaschu agus Buidheann Coinnichidh Ghlaschu. Choinnich sinn ann an Taigh-òsta Earra-Ghàidheal aig a bheil luchd-obrach le Gàidhlig.

Abair gun robh deagh oidhche ann le seachd sgioban an sàs agus ceistean air tòrr cuspairean, feadhainn aca doirbh is feadhainn a bha furasta. Bha duaisean ann airson an sgioba a bhuannaich agus an dàrna àite. Anns na dealbhan chì sibh an sgioba a bhuannaich le Coinneach Combe a leugh nan ceist.

Bidh an ath cho fharpais Oidhche Chiadain 16mh Ògmhìos aig 7:30f san aon àite. Chì sinn ann sibh!

Adhartas ann an Loch Abair

2010-05-17T10:29:00.007+01:00

Tha CnaG 's Iomairt Ghàidhlig Loch Abair air a bhith trang le diofar phroiseactan air feadh na sgìre. Tha clasaichean Gàidhlig air leudachadh gu mòr on a chaidh an Iomairt a stèidheachadh 's a' mhòr-chuid ag ionnsachadh tro Ùlpan. Tha an Iomairt cuideachd a' cur air dòigh trèanadh do fhileantaich gus fàs a thoirt air goireasan-ionnsachaidh na sgìre.

Chaidh soidhnichean dà-chànanach a chur suas air an A82 bho chionn ghoirid 's iad a' ruighinn a' Ghearasdain fhèin. A bharrachd air ainmean-àite, tha cainnt mar "Fuireach Fada" orra 's iad dà-chànanach air fad. Tha e glè chudromach gu bheil cainnt mar seo orra 's tha teachdaireachd ann a thaobh àbhaisteachadh na Gàidhlig. Tha CnaG air a bhith an sàs le soidhnichean bho chionn fhada agus tha sinn toilichte adhartas a bharrachd fhaicinn.

Tha an obair seo a' dol air adhart mar phàirt de dh'Iomairt a dh'aontaich Lewis Dòmhnallach a bha aig an àm na Leas Mhinisteir airson Comhdhail ann an 2004. Bhon uairsin, chan eil aonta a bharrachd air a bhith ann a thaobh soidhnichean dà-chànanach air prìomh rathaidean. Tha Transport Scotland a' dèanamh rannsachadh an dràsta air a' bhuaidh aig an iomairt seo 's ann stèidhichte air seo a bhios co-dhùnaidhean san àm ri teachd.

Thàinig an iris mìosail "What's On" a-mach aig toiseach na mìos. Tha seo air fhoillseachadh leis an OCUK agus tha sinn gu math toilichte beagan Gàidhlig a chur ann a h-uile mìos. Cum do shùil a-mach air a shon.

Seachdain nan Sgoiltean

2010-05-12T15:26:00.003+01:00

Bha luchd-obrach Chomunn na Gàidhlig toilichte taic a chumail ri Comunn nam Pàrant (Nàiseanta) a-rithist aig Seachdain nan Sgoiltean ann an Dùn Èideann am bliadhna. Bha na buidhnean bho na bun-sgoiltean a tadhal air an Lios Luibheach Rìoghail, An Caisteal, An Gaileiridh Nàiseanta, Our Dynamic Earth agus am Fruitmarket. Chòrd e rinn agus ri na sgoilearan a bhith an sàs. Tha tachartasan mar seo cho cudromach ann a bhith sealtainn dhan òigridh gur e rud nàdarra a th’ anns a’ Ghàidhlig taobh a-muigh na sgoile.

Brataich ann an Glaschu

2010-05-12T09:36:00.003+01:00

Tha am bratach seo am measg co-dhiù trì le abairtean Gàidhlig sgrìobhte orra a nochd ann an Glaschu bho chionn ghreis. Tha seo aig an crois rathad eadar Sràid Earra-Ghàidheal agus Rathad Dhùn Bhreatainn. A bheil fios aig neach sam bith cò rinn iad?

Farpais ball-coise

2010-04-30T12:42:00.001+01:00

Chaidh farpais ball-coise a chumail ann an Ionad Spors Lionacleit airson clann anns a bhun-sgoil.
Chaidh an oidhche a chuir air dòigh le Màiri Anna Chaimbeul an oifigear air Iomairt Cànain Uibhist a Deas agus Èirisgeigh le taic bho Dòmhnall Iain agus Catriona aig Foghlam Coimhearsnachd.

’ S e amas na h-oidhche gun cleachdadh a chlann Gàidhlig ri chèile agus ris na h-inbhich a bha an làthair.
Bha 5 sgioba ann agus bha farpais air leth ann. Bha co-dhiù aon nighean anns gach sgioba agus rinn iad air fad deagh oidhirp Gàidhlig a chleachdadh.
’ S e sgioba a Sgoil Èirisgeigh a’ rinn a chùis le sgioba bho Sgoil Dhalabrog anns an darna àite.
‘ S e oidhche gu math spòrsail a bha ann agus chòrd e ris a h-uile duine a bha an sàs ann.
Feumar taing a thoirt do na tidsearan agus na pàrantan a thàinig a-mach leis an òigridh agus do Duncan agus Eilidh airson an cuideachadh air an oidhche.

Tiugainn a Dhannsa

2010-04-30T11:48:00.003+01:00

Chaidh an tachartas coimhearsnachd seo a chuir air dòigh mar phàirt de Iomairt Ghàidhlig Uibhist a Deas agus Èirisgeigh. Bha Lena Nic Illfhialain agus Club Dannsa Naomh Pheadair ann an Dalabrog gu mòr an sàs an oidhche seo a chuir air dòigh.

Bha 8 fireannaich agus 8 bhoireannaich bhon chlub deònach a bhith nan farpaisich air an oidhche agus ’s ann air an oidhche a fhuair iad a-mach cò a bha a’ dannsa còmhla.

Bha tri bhritheamhan ann airson puingean a thoirt seachad agus ’s iad sin Shona Sloan a tha bho Uibhist a Deas ach a tha ag obair air tìr mòr airson Bòrd na Gàidhlig, Calum Anthony Peutan agus Mgr Ruaraidh MacAmhlaigh.

Bha aig na cupail ri 8 dannsaichean a dhannsa – dannsaichean mar Na Quadrilles agus Pride of Erin Waltz. ’S e Margaret Walker agus Hugh MacCormick a’ rinn a chùis às dèidh na h-ochd dannsaichean.

Bha sinn gu math fortanach gun robh ceòl beò againn bho Na Deasaich agus cuideachd òrain Ghàidhlig a chluinntinn bho Choinneach Caimbeul a tha na bhall den chlub dannsa agus Cara Creighton a tha na sgoilear ann an Sgoil Dhalabrog.

Farpais cheist Taigh-seinnse

2010-04-21T12:09:00.003+01:00

Tha Iomairt Ghàidhlig Ghlaschu le taic bho Chomunn na Gàidhlig agus buidheann coinneachaidh Ghàidhlig Ghlaschu a cuir air dòigh farpais cheist taigh-seinnse a bhios air 19mh Cèitean 2010 ann an Taigh-Òsta Earra-Ghàidheal aig 7:30f. Tha sinn an dùil ri oidhche spòrsail, neo-fhoirmeil le ceòl às dèidh na ceistean. Cosgaidh e £2 gach neach a bhith an sàs le suas gu 4 anns gach sgioba agus bidh duais ann.
Tha sinn ag amas gum bi am farpais seo mar phàirt de sreath cunbhlalach san àm ri teachd.
www.glaschu.org/farpaischeist.htm

Cuin a bhios an ath fiolm Ghàidhlig againn?!

2010-04-19T14:56:00.005+01:00

An Dealbh gu h-àrd air a nochdadh le cead Young Films

An tug thu riamh an aire gu bheil balaich agus clann-nighean a' tionndadh nan deugairean dà bhliadhna nas tràthaiche ma tha Gàidhlig aca? Is e seo an t-adhbhar, a-reisd. Feumaidh tu bhith 'thirteen' airson a bhith nud 'teenager'. Ged-tà, ma tha thu tuigsinn Gàidhlig, tha thu tionndadh nud 'dheugaire' aig aois aon bhliadhn' dheug!

Chòrd saor làithean na Caisg ruinn ann an Ìochdar Thròndairnis. Bha tìde mhath ann dha na h-uain agus dhan chrodh laoigh. Chum Lasair oidhche dha na deugairean aig Columba 1400 ann a Stafainn. Sheall sinn am fiolm 'Seachd' ann. Bha gu leòr an-làthair nach fhaca riamh am fiolm, agus thug feadhainn leotha an cuid co-oghaichean a bha aig baile à sgìrean eile. Chuala sinn bho Mhòrag Stiùbhart mu na cothroman a dh'fhaodas a bhith romhainn ann an saoghal chruthachail nam fiolmean.

Cò chì sinn a-reisd san àth fiolm Ghàidhlig ... ?

Fàs na Gàidhlig - Bho 46% gu 81% ann an 10 Bliadhna!!

2010-04-08T07:15:00.005+01:00

Tha a' chiad deich bliadhna den linn air a dhol seachad gu math luath. Dè th'air tachairt san eadar-ama a thaobh fàs na Gàidhlig? Is iomadh rud sin, a chàirdean, ach saoilidh mi gu bheil e na chuideachadh sùil bheag a thoirt air pàtranan. Mar eisimplir, seallaibh air an naidheachd bheag bhuainn fhìn à sgìre Ìochdar Thròndairnis ...

Dhen 76 àrd-sgoilearan às an sgìre ann an 2010, tha 46% air foghlam tro mheadhan na Gàidhlig fhaotainn sa bhun sgoil. Nise, faodaidh sinn coimeas a dheanamh eatorra agus clann nam bun-sgoiltean. A' seasamh aig 73 duine cloinne, chithear gu bheil na h-àireamhan cha mhòr co-ionnan. Ged-tà, tha diofar mòr ann a-rèir cia mheud a tha faotainn foghlam tro mheadhan na Gàidhlig. An dèidh cùisean a sgrùdadh, tha mi toilichte ràdh ruibh gu bheil 81% de bhun-sgoilearan an Ìochdair sna clasaichean Ghàidhlig againn. Chithear fàs ann am miann theaghlaichean a thaobh foghlam sa Ghàidhlig. Tha e soillear ga rìreabh gu bheil Sgitheanaich san Ìochdar ag iarraidh foghlam Ghàidhlig dhan chuid chloinne. Nach math an naidheachd!

Am faca sibh an t-suaicheantas ùr aig Lasair?

2010-04-08T06:41:00.004+01:00

Ma dh'fhaodhte gu bheil cuimhne agaibh gu robh Lasair a' tabhann duaise tro farpais airson suaicheantais ùir. Thug e toileachas mòr gu robh Donaidh Rothach deònach a bhith na bhritheamh dhuinn. Tha Donaidh na Chathraiche den Ealain Lèirsinneach aig Colaiste Sabhal Mòr Ostaig. Is e Sèan Firth à Stafainn san Eilean Sgitheanach a thog am prìomh dhuais. Tha Sean 14 bliadhna, agus san treas bliadhna ann an Àrd-sgoil Phort Rìgh. Chithear suaicheantas Sean an-seo, agus Dùn thuilm àrsaidh ri teàrnadh na grèine. Nach e tha snog! Meal a naidheachd air Sean a choisinn £100, agus taing mhòr dhan a h-uile duine a rinn pìos obrach do Lasair!

Deagh naidheachd aig Àm na Caisg

2010-04-01T16:34:00.002+01:00

Tha sinn air a bhith ag obair gu cruaidh le ionadan-sgithidh na h-Alba 's a' cumail taic riutha le soidhnichean 's eile. Ach cha robh fianais againn gu bheilear a' cur fàilte air na soidhnichean ùra a tha seo chun an latha an diugh.

Sheall rannsachaidh a rinn sinn air loidhne 's le agallamhan gu bheil a' mhòr-chuid a' ur an làn taic ri soidhnichean dà-chànanach aig ionadan-sgithidh - 69%. Chan eil ach 11% nan aghaidh le 20% coma. Bha am figur seo na b' àirde na bha dùil againn ach tha sinn a' cur fàilte mhòr air.

An deireadh-sheachdain seo, chì coir 's fichead mìle neach soidhnichean dà-chànanach aig na h-ionadan sgithidh. Cha dèan seo ach feum a thaobh na Gàidhlig.

Taic ri buidhnean ann an Earra Ghàidheal

2010-03-24T09:37:00.004Z

Mar phàirt de chumhnant HIE, tha aig CnaG ri taic a thoirt do bhuidhnean air feadh na Gàidhealtachd 's nan Eilean le seirbheisean Gàidhlig. Chuir sinn seachad latha san Òban 's Cinn-tìre a' toirt sùil air mar a ghabhas Gàidhlig a thoirt a-steach do bhuidhnean.

'S e latha soirbheachail a bh' ann agus tha sinn glè dhòchasach air na cothroman a th' ann. Bidh sinn ag obair le Stramash, Slighe Chìnn-tìre agus Urras Eilean Chearrara agus buidhnean eile sa sgìre. A bharrachd air taic pragtaigeach, bidh cothrom aig na buidhnean seo taic-airgid fhaighinn tro na sgeamaichean aig CnaG. Tuilleadh fiosrachaidh an seo.

Chunnaic sinn am bàta seo ri taobh a' chidhe. Le taic, lèirsinn 's obair, thèid i gu muir a-rithist.....

Seachdain aig Loch Iall

2010-03-22T09:46:00.003Z

Chuir sinn seachad seachdain aig Outward Bound Loch Iall an t-seachdain 's a chaidh. Bha seo airson taic a chumail ri Sgoil Ghàidhlig Ghlaschu a bha ann airson cùrsa fèin-leasachaidh a dhèanamh.

Bha geamanan, campadh, coiseachd, seòladh 's togail raithean a-measg na diofar rudan a rinn na sgoilearan agus chòrd e ris a h-uile air fad. Bha dubhlan ann aig diofar ìrean ach cothrom aig a h-uile duine pàirt a ghabhail. Bha e math a bhith ann an Tìr nam Beann, Tìr nan Gleann 's Tìr nan Gaisgeach agus gu dearbh bha gaisgaich gu leòr againn gach latha.

'S e amas a bh' againn seachdain spòrsail a chur air adhart tro mheadhan na Gàidhlig. Tha seo beagan doirbh oir nach eil luchd-stiùiridh ann le Gàidhlig airson na diofar gnìomhan. Gu mi-fhortunach, tha e coltach nach cum na cùrsaichean seo a' dol an dràsta le gainnead luchd-stiùiridh aig a bheil Gàidhlig. Tha feum air siostam leasachaidh far am bi luchd-stiùiridh le Gàidhlig air an trèanadh.

CnaG aig Oilthigh Ghlaschu

2010-03-12T15:30:00.003Z

Tha an dealbh a’ sealtainn luchd obrach oifis Ghlaschu agus Rhona NicDhùghaill aig seisean dreuchdan ann an Oilthigh Ghlaschu Diciadain. Bha iad a toirt seachad fiosrachadh mu dheidhinn sgeamaichean obrach Chomunn na Gàidhlig.

Tha Rhona NicDhùghaill air a bhith ag obair aig an oifis ChnaG ann an Glaschu fad trì seachdainean. Tha i na oileanach aig Sabhal Mòr Ostaig an-dràsta, ’s tha aig a h-uile oileanach greis gnìomhachas a dhèanamh mar pàirt den cùrsa aca.

Bha Rhona airson tighinn do Chomunn na Gàidhlig a chionn ’s gu bheil ùidh aice ann an leasachadh na Gàidhlig. Tha i air a bith ag obair san oifis, agus aig tachartasan eile taobh a-muigh an oifis: fèill dreuchdan aig an SECC, latha dreuchdan Gàidhlig aig Oilthigh Ghlaschu, ’s clubaichean Sradagan cuideachd.

Chòrd na trì seachdainean rithe, ’s tha Rhona ’n dòchas gum bi i an sàs ann an leasachadh na Gàidhlig nuair a bhios i deiseil aig an t-Sabhal.

Eilean Green

2010-03-11T16:39:00.005Z

Tha Eilean Green, à Achd Ille Bhuidhe, air a bhith ag obair còmhla riunn fad trì seachdainean mar phàirt dhen sgeama greis gnìomhachas aice aig Sabhal Mòr Ostaig. Rinn Eilean ceum aig Oilthigh Ghlaschu agus tha i a nis na oileanach air a chùrsa chomais aig Sabhal Mòr Ostaig ann an Slèite.

Am measg na diofar phròiseactan anns a bheil Eilean air a bhith an sàs thairis na trì seachdainean aice aig CnaG, bha i latha aig Monadh Nibheis a' deànamh obair rannsachaidh agus a' sireadh beachdan a' phobaill air soidhnichean ùra dà chànanach aig na h-ionadan sgithidh ann an Alba.

Cùmhnant Iomairt na Gàidhealtachd

2010-02-22T11:56:00.002Z

Bha sgioba ChnaG, a bhios a lìbhrigeadh cùmhnant Iomairt na Gàidhealtachd, còmhla aig seisean trèanaidh ann an oifis Inbhir Nis Dihaoine 19mh Gearran. Tha fadachd orra an obair seo a dhèanamh agus tha iad ro dheònach ceistean a fhreagairt mu dheidhinn na sgeamaichean taic ionmholta mu choinneimh gnìomhachas is coimhearsnachd anns am bi iad an sàs.
Tha tuilleadh fiosrachaidh mu na sgeamaichean ùra seo air làrach-lìn ChnaG.

Fàilte is Fonn!

2010-02-16T11:29:00.005Z

Bidh Comunn Gàidhlig Inbhir Nis a' cumail na Cuirm Bhliadhnail aca aig Eden Court air Dihaoine 12mh Màirt, le: Caitlin NicAonghais, Magaidh NicDhòmhnaill, Art MacCarmaig, Pòl MacCaluim, Canntaireachd, Mìcheal MacMhaoilean le Còmhlan Cèilidh Eilean Mhònach, agus am pìobaire Dr Angus. Fear an Taigh – Ailean Caimbeul. Thèid a' chuirm a chumail tro mheadhan na Gàidhlig, le eadar-theangachadh dhan bheurla air ‘powerpoint’. Tha sinn an dòchas gun tèid gu math leotha 's gum bi sluagh mòr ann.

Latha aig Sabhal Mòr Ostaig

2010-02-15T11:36:00.005Z

Bha ceathrar againn bho CnaG aig Sabhal Mòr Ostaig Diardaoin sa chaidh airson coinneamh fad an latha. A bharrachd air coinneamh glè fheumail, bha e tlachmhor a bhith a' faicinn tòrr oileanaich ùra aig Sabhal Mòr agus cuideachd na seallaidhean eireachdail tarsainn air Linne Shlèite!

Iarrtas làidir airson Iomairt Ghàidhlig ann an Dùthaich MhicAoidh 's Asainte

2010-02-09T11:34:00.003Z

'S e latha trang, soirbheachail a bh' ann aig a Chruinneachaidh aig an Ruigh Chòinnich (faisg air Ceann Loch Biorbhaigh) Disathairne sa chaidh. 'S a mhadainn chualar taisbeanaidhean bho diofar bhuidhnean choimhearsnachd air feadh Asainte is Dùthaich MhicAoidh. Chuala sinn cuideachd bho Mhòd Ghallaibh agus mar a tha iad trang a' deasachadh airson a Mhòd anns an Damhair. Bha a h-uile duine trang feasgar 's iad a' deasbad 's ag obair ann am bùthan-obrach airson na beachdan aca a chlàradh. Chaidh na beachdan agus molaidhean a chur ri chèile aig deireadh an latha agus tha muinntir na coimhearsnachd a nis air fios-naidheachd a chruthachadh, a chaidh a sgaoileadh an dè:
"Chaidh aontachadh aig A' Chruinneachadh gu bheil a' Ghàidhlig agus a cultar cudromach do mhuinntir Asainte 's Dùthaich MhicAoidh. As dèidh obair 's stiùireadh bhon choimhearsnachd thairis na 18 mìosan a chaidh seachad, tha cothrom ann an dràsta a bhith fàs àireamhan luchd-labhairt agus cothroman a chruthachadh don chànan a bharrachd air an eaconamaidh a neartachadh. Tha coimhearsnachdan ann an Asainte 's Dùthaich MhicAoidh a-nis a' cur impidh air Bòrd na Gàidhlig Iomairt Ghàidhlig Dùthaich MhicAoidh 's Asainte a stèidheachadh."

An t-slighe air adhart dhan Ghàidhlig an Asainte agus Dùthaich MhicAoidh

2010-02-01T16:43:00.003Z

Disathairne 6mh Gearran aig Taigh-Òsta an Ruigh Chòinnich, coinnichidh muinntir Asainte & Dùthaich MhicAoidh gus beachdachadh air an t-slighe air adhart airson leasachadh na Gàidhlig san sgìre. Tha an “Cruinneachadh” seo ga chuir an gnìomh às dèidh pròiseact rannsachaidh a chaidh a dhèanamh le Urras Dùthaich MhicAoidh am bliadhna. Chruinnich iad fiosrachadh mu Ghàidhlig ann an Dùthaich MhicAoidh agus thèid an rannsachadh fhoillseachadh air 6mh Gearran aig an tachartas. Chuir Bòrd na Gàidhlig, Iomairt na Gàidhealtachd ‘s nan Eilean, Comhairle na Gàidhealtachd agus Comunn na Gàidhlig taic ris a phroiseact. Bidh tagraichean bho na buidhnean Gàidhlig an làthair agus tha iad airson bruidhinn ri daoine agus buidhnean às a choimhearsnachd aig a bheil ùidh ann an leasachadh na Gàidhlig ann an Asainte & Dùthaich MhicAoidh. Tha dreach clàr-gnothaich gu h-ìosal. Tha cuireadh ann do bhuidheann choimhearsnachd, companaidh no neach sam bith a tha airson taic a chur ri fàs na Gàidhlig san sgìre.

1030 Tì & Cofaidh / Fàilte
1100 Fàilte – Urras Choimhearsnachd MhicAoidh
1110 Poiliseadh Gàidhlig agus Leasachadh - Alba & a' Ghàidhealtachd – Dòmhnall Morris, Comunn na Gàidhlig
1125 Rannsachadh Ionadail gu ruige seo – Issie NicPhàil
1140 Tì & Cofaidh
1155 Asainte – Còmhlan Gàidhlig Asainte
1205 Ceumannan Ro Sgoile – Lisa NicDhòmhnaill, Sgobhairidh
1215 Fios bho Thaigh na Gàidhlig Melness - tachartasan - Sgoiltean Samhraidh - rannsachadh
1225 Taisbeanadh mu Mhòd Ghallaibh - Mòd Nàiseanta 2010- le Carol-Anne NicAoidh
1235 Fèis Air An Oir - Tachartasan agus Leasachaidhean - Janette Mackay, Srathaidh
1245 Lòn
1345 Deasbad Fosgailte
1415 An t-slighe air adhart: Còmhradh ann am buidhnean
1500 Fios air ais agus aonta air na h-ath ceumannan
1530 Dùnadh agus taing

Suaicheantas ùr do Lasair

2010-02-01T12:21:00.004Z

An Cuilthionn, ann an earradh a' gheamhraidh. Nach àlainn ar dùthaich!

Is fhada nuairsin a chàirdean!

Tha farpais a' dol air adhart an-dràsta fhèin airson suaicheantas ùr fhaighinn do Lasair. Bidh Lasair ('a flame' sa Bheurla) ag obair ann an sgìre Ìochdar Thròndairnis airson fàs a thoirt air cothroman dhan Ghàidhlig. Taobh a-staigh an sgìre againn, bidh clann à Stafainn, Cille Mhoire, Uige, Ceann Sail Eighre agus Borbh a' frithealadh àrd-sgoil Phort Rìgh. Tha 75 àrd-sgoilear às na ceàrnaidhean sin sa sgìre againn - agus lethach aig a bheil Gàidhlig gu fileanta. Fhuair iad uile (75 sgoilearan) an cothrom suaicheantas ('logo') ùr a chruthachadh dha buidheann 'Lasair'. Is e 9 An Gearann 2010 an latha mu dheireadh airson suaicheantas a chruthachadh. Tha sinn a' guidhe soirbheachas dhaibh/dhuibh (!) uile!
Ma tha ceist agaibh, carson nach cur sibh post dealain gu sineg@cnag.org.uk. Is mise Sìne Ghilleasbuig, agus bidh mi toilichte cluinntinn bhuaibh. Latha math!

Duaisean do Sgoilearan Thròndairnis

2010-02-01T12:10:00.005Z

Britheamhan Maoilios Caimbeul agus Mairead NicNeacail a’ toirt seachad ‘Duais a’ Gheamhraidh’ dhan dithis a choisinn an duais airson na Gàidhlig. Còmhla riutha, tha Catrìona Rothach à buidheann stiùiridh Lasair, a bhrosnaich an duais.

Choisinn dithis ann an Ìochdar Thròndairnis ‘Duais a’ Gheamhraidh’ son oidhirp is sgilean sa Ghàidhlig. Bha ‘Duais a’ Gheamhraidh’ air a thabhann dhan sgoilear ann an clas a-sia no a-seachd a rinn am pìos sgrìobhaidh a b’ fheàrr a thaobh gràmar na Gàidhlig. B’ iad am bàrd, Maoilios Caimbeul agus Ceannard nan sgoiltean, Mairead NicNeacail, britheamhan na duaise. Fhuair na h-igheanan teisteanas agus duais de £25 an urra. Chaidh an t-airgead a thoirt seachad le Lasair (Iomairt Ìochdar Thròndairnis) a bhios a’ brosnachadh chothroman dhan chànain.

Taisbeanadh sgìreil - Asainte

2010-01-25T16:05:00.003Z

Air Diardaoin 28mh Faoilleach cumaidh CnaG taisbeanadh sgìreil mun Ghàidhlig ann an Asainte. 'S e coinneamh phoblach a bhios ann, aig am Mission ann an Loch an Inbhir aig 7f agus cuiridh sinn fàilte air neach sam bith san sgìre aig a bheil ùidh ann an Gàidhlig no beachdan mun t-slighe air adhart. 'S e an sgrìobhadar agus craoladair Ruairidh MacIlleathain a bhios a' stiuireadh an fheasgair le taisbeanadh innteanach mun Ghàidhlig - bidh fiosrachadh ann air ainmean àite, foghlam Gàidhlig agus taic do ghniomhachasan. Bidh cothrom ann as dèidh làimh airson deasbad agus beachdan air an t-slighe air adhart dhan Ghàidhlig ann an Asainte.

Disathairne san t-Samhainn - Tuireadh an dèidh Thuiltean

2009-12-04T14:34:00.010Z

An dèidh mhìos a bha comharraichte de thuiltean is ghaoith, chuir sinn fàilte mhòr air an tuireadh nuair a dhùisg sinn Disathairne seo chaidh.

Romhainn, bha cruinneachadh de dheugairean Ìochdair Thròndairnis ann an Ionad Cholm Chille, ann an Stafainn.

Agus, abair gun robh latha math againn.

Fhuair sinn cothrom geamaichean bhall-coise a chliuch aig an raon ùr - fo stiùireadh Dhòmhnaill Àrois. Ged bu bheag feadhainn de na cliuchadairean, cha robh nigheanan na sgìre bog nuair a thàinig e gu geama bhall-coise cuide ri balaich tapaidh an Ìochdair.

Ma dh'fhaodhte gur e seo a' chiad uair a chumar Tae Kwon Do ann an Stafainn, ach gu cinnteach cha robh an teagaisg Coirìanach riamh roimhe sa Ghàidhlig air an Taobh Sear.

Còmhla rinn son an latha, bha 'Sealladh' à Slèite, ag innseadh mu obair dhìomhair a' chamara.

Bha na nigheanan air bhireann faighinn an sàs ann am 'Maise gnùise'. Coma leat dè cho bòidheach is a bha iad a' cuir cùil ris an taighe, ach is e leadaidhean ghleansach, spaideal a bha fainear do Dad nuair a thill iad dhachaigh, sùilean ioma-datach, liopan pionc agus ciabhagan phroifeasanta.

Air taobh tuath an Eilein Sgitheanaich, chan eil sinn a' cleachdadh Ionad eireachdail Cholm Chille cho tric is bu chòrr. Bha an t-àite againn dhinn fhìn fad an latha. Tha e blàth agus tlachdmhor a bhith cuir seachad an latha ann, le iomadach uinneag agus sealladh àlainn nam monaidhean is Loch Stafainn ri faicinn àisde.

Cha deach sinn dhachaigh leis an t-acras, oir thàinig Jackie NicGilliosa, manaidsear an Ionaid, a-steach air a latha dheth gus burgaran is pizzan a bhruich dhinn.

Bu thoil le Lasair taing a thoirt do Choinneach Chombe agus Moira NicÌomhair a shiubhail à Glaschu airson an latha seo a chruthachadh. Às an Eilean fhèin, bha sinn toilichte gun do rinn Mòrag Stiùbhart agus Vicky NicIlleathain an gnothach a bhith còmhla rinn a dh'aindeoin's rathad an A87 a bhith dùinte bho 0930 gu 1745. Agus rinn e togail dhinn gun robh Ailsa Lyall an làthair gar cuideachadh.

Aig deireadh an latha, cha robh ann ach aon cheist fainear - "Cuin a nì sinn seo a-rithist?!"

Ma tha beachdan agaibh fhèin mu chothroman do dheugairean, carson nach cuir sibh brath gu

Sìne aig Lasair (Iomairt Ìochdair Thròndairnis) air sineg@cnag.org.uk Bhiodh e math cluinntinn bhuaibh.

Leasachadh air Iomairtean Gàidhlig

2009-12-02T11:26:00.004Z

Tha sinn an dràsta a' cur an gnìomh Iomairtean Gàidhlig ann an diofar sgìrean air feadh na h-Alba. Thòisich Iomairtean Gàidhlig anns a' Ghiblean 2009 ach chaidh tòrr obair a chur an gnìomh anns na bliadhnaichean roimhe seo gus sgìrean uallachadh.

Tha sinn air adhartas mòr a dhèanamh leis na h-Iomairtean Gàidhlig a tha seo 's iad uile eadar-dhealaichte bho chèile agus a' cur an gnìomh na proiseactan aca fhèin.

Gun teagamh, tha coimhearsnachd a' cur fàilte air goireasan agus spionnadh ach tha feum air adhartas agus fianais a shealltainn gu bheil iad ag obair.

Sin aon de na rudan a tha sinn a' dèanamh an dràsta gus na h-Iomairtean a neartachadh 's an sàr-obair a shanasachd.

Latha Fiosrachaidh sa Ghearasdan

2009-11-17T16:58:00.006Z

Air madainn Disathairne fliuch, fuar, thànaig Nip (cuilean aig Storlann) dhan Ghearasdan. Chòrd seo gu mòr leis a' chionne agus sgrìobh iad cairt airson taing a thoirt gu Nip airson tighinn.

'S e là fiosrachaidh a bh' ann aig Roinn Sgoile Ghàidhlig a' Ghearasdain a bha seo airson pàrantan agus cothrom aca barrachd fiosrachaidh fhaighinn mu na goireasan, Foghlam tro mheadhan na Gàidhlig agus buannachdan dà-chànanach.

Chaidh an tachartas seo a chur air adhart le Iomairt Ghàidhlig Loch Abair. Gheibhear fiosrachadh a bharrachd mun Iomairt an seo. Tha cothrom aig duine sam bith sa choimhearsnachd a bhith an sàs ann an leasachadh na Gàidhlig ann an Loch Abair. Chan fheum sibh ach nochdadh aig an ath choinneamh den bhuidheann stiùiridh a ghabhas àite air 10 Dubhlachd 2009 ann am Malaig. Tuilleadh fiosrachaidh bho Eilidh Shaw air 01397-701988

An robh thu aig a' Chèilidh an-raoir?

2009-11-12T16:09:00.001Z

Mar a thuirt am fear eile - "An robh thu aig a' Chèilidh an-raoir ... "An robh mise aig a' Chèilidh an-raoir?"

Uill, chan e siud an seòrsa chèilidh a bha againn ann an Talla Chille Mhoire a' chiad oidhche Haoine den t-Samhainn. Agus abair chèilidh a bha againn le ar cuid chloinne air an àrd-ùrlar. Ghabh 16 duine cloinne às bun-sgoiltean Stafainn is Chille Mhoire pàirt ann, fhad is a bha coìgnear às àrd-sgoil Phort Rìgh.

Bha bean an taighe, Anna Mhàrtainn, aig an taighe gu cinnteach, agus a dachaigh beagan slàtan sìos an rathaid - ann an Lianacro, far a chleachd dhaibh a bhith a' fàs lian 'flax' aig aon am.

Thòisich sinn mas math mo chuimhne le seinn na pìoba, air a gabhail le fear a tha naoi bliadhn' a dh'aois, a' gluasad gu nàdarra gu bhi seinn salm 16, air a gabhail ri fonn 'Moravia'. Tha an guthan binn, ceòlmhor, tha mi ag innse dhuit.

Is e tlachd a bha ann a bhith ag èisdeachd ri pìos dhràma a chaidh chuir ri chèile le te de na Mamaidhean, Josie Nicleòid. Chunna' sinn 'bodach' mas fhìor air an àrd-ùrlar agus feusag mòr air fàs air! Tuigidh tu a-rèist gu robh am fear seo "fada gun pòsadh". Ged-tà, ruisg càich fheusag dheth, agus rinn am buidheann banais eadar Mòrag agus Dòmhnall. Chòrd seo ris an luchd-èisdeachd gu mòr.

Tha sàr fhìdhlear òg à Borgh na Sgiotaig. Ceart, tha mi mach air Ailean Peutan, à Borgh na Sgiotaig. Tha an teaghlach seo air cliù a choisinn mar cheòlaidearan. Bidh Ciorstaidh a' frithealadh Sgoil Chiùil Dhùn Èideann. Tha an fhear as òige, Eoghann, air a' phìob mar thà, is e dìreach naoi bliadhna a dh'aois.

Chan eil sinn a' tuigsinn uaireannan cho mòr agus a tha ar dualchas. chuala sinn sgeulachdan mu ghaisgich na sgìre. Rinnear criomagan beaga air na 'rivals', Mo Luag agus Colm Cille. Chuala sinn mun fhear Ailean, aig an robh 'mìle mart', agus a bhean, Fionnghal nighean Raghnaill, ic Aonghais òig. Cò ach Flòraidh NicDhòmhnaill, aig a bheil buinteanas mòr ri ar sgìre Thròndairnis.

Chan eil fios aig mòran gu robh fear à Tròndairnis a bha air a bhi thall agus a chunnaic Antarctica a m'eadail! Chualar gur ann à Cille Mo Luaig a dh'fhalbh Eòghann Dòmhnallach ann an 1916, air bòrd an 'Aurora' còmhla ri Sir Ernest Shackleton.

Bha ceathrar nighean à Cille Mhoire còmhla rinn ri luadh (waulking the tweed). is iad seo na h-òrainn a ghabh sinn - 1) An Cul Bachallach (òran na sgìre); 2) Mo Chruinneag Bhòidheach; 3) Agus ho Mhàiri; agus (!) 4) Am Breacan Uallach leis an Seumasach ainmeil, Alasdair mac Mhaighstir Alasdair. Creid thus' gu robh fealla dhà againn. Chan urrainn dhuit gun gàire a dheanamh nuair a tha thu ri luadh!

Ghabh fear às an luchd-èisteachd, John Howieson, òran. Tha e math air seinn, innsidh mi dhuit, cuideachd.

Is e cuspair na h-oidhche, A' Tilleadh dhan Ghàidhlig. Cha chualas facal Beurla fad na h-oidhche, ged a bha prògram sgrìobhte sa Bheurla dhaibhsen nach eil fileanta sa Ghàidhlig fhathast.

Bha oidhche air leth snog againn. Is bochd nach robh sibh còmhla rinn!
Tha sinn a' toirt taing do mhuinntir Stafainn is Chille Mhoire, pàrantan is clann na sgìre, tìdsearan is ceannard an dà sgoil, Mairead NicNeacail, Anna Mhàrtainn agus mnathan an luaidh. Bha sinn toilichte gu robh Rosie Somerville às leth A' Chraoibh ann. Thug am buidheann sinn taic-airgid dhinn airson cèilidh a chumail air cuspair mun Tilleadh Dhachaigh. Rinn sinn sinn fhin aig an taighe, gun teagamh!

Peant fliuch ann an Inbhir Nis

2009-11-06T15:07:00.005Z

Nach eil e math nuair a tha cuideigin a' brosnachadh na Gàidhlig air an ceann fhèin? Tha an companaidh seo ag obair air oifis air an oisean eadar Sràid na h-Acadamaidh agus Caolraid Strothers 's a' peantadh an taobh a-muigh.

Mhothaich sinn gu bheil iad air soidhnichean geàrr-ùine a chur suas 's iad dà-chànanach.

Tha seo math oir tha e a' sealltainn na Gàidhlig ann an suidheachadh àbhaisteach, làitheil.

Tha am prionnsabal seo glè chudromach ann an leasachadh na Gàidhlig 's an ath-ghinealach a' coimhead air a' chànan mar rud àbhaisteach nar saoghal.

Tha sinn a' cur meala naidheachd air a' chompanaidh seo agus airson taic a thoirt do chompanaidhean eile a' leantainn an eisimpleir seo.

Latha trèanaidh sa Ghleann Mhòr

2009-11-04T10:12:00.005Z

Tha beagan sneachda air na beanntan agus gnìomhachas spòrs ag uallachadh airson a' gheamhraidh. Tha sinn air a bhith cumail taic ri Ionadan Sgithidh na h-Alba le eadar-theangachadh, soidhnichean 's eile agus mar phàirt seo, chuir sinn air adhart latha trèanaidh do luchd-obrach nan ionadan.

Thàinig ceithir duine deug còmhla aig Loidse a' Ghlinne Mhòire air a stiùireadh le Ruairidh MacIlleathainn. Sa mhadainn chaidh Ruairidh tro bheagan eachdraidh air a' Ghàidhlig agus bun-fhiosrachadh air fuaimneachadh. Feasgar, thugadh sùil air na mapaichean-piste 's soidhnichean aig na h-ionadan. Tha seo cudromach airson gum faigh luchd-obrach eòlas air na leasachaidhean aig an àite-obrach aca fhèin.

Chaidh aontachadh air leasachaidhean a bharrachd leithid beagan fiosrachaidh air làraich-lìn nan ionadan agus bidh CnaG ag obair leotha gus seo a chur an gnìomh.

Iomairt Ghàidhlig Ghlaschu – Baile Mòr na Gàidhlig

2009-10-30T11:28:00.001Z

Tha Iomairt Ghàidhlig Ghlaschu – Baile Mòr na Gàidhlig – air a bhith trang. Tha dà choinneamh air a bhith aig am bòrd-stiùiridh a-nis is sinn ag amas air pròiseactan a thogas ìomhaigh na cànain sa bhaile agus leudachadh àireamh sgoilearan ann am foghlam tro mheadhan na Gàidhlig.

Cumaibh sùil a-mach airson làrach-lìn a dh’aithghearr agus ma tha sibh airson taic a cuir ri na h-iomairt nach cuir sibh fios gu sine@cnag.org.uk no 0141 3392022.

Cothrom air Iomairt Gàidhlig ùr?

2009-10-29T10:10:00.005Z

Tha CnaG air a bhith cur air adhart Iomairtean Gàidhlig ann an seachd sgìrean air feadh na h-Alba 's iad a' dol gu math. 'S e seo a' phrìomh mhodail leasachaidh a bhios ga chur an gnìomh anns na bliadhnaichean ri thighinn.

Ach tha tòrr adhartas air a bhith ann an sgìrean eile.

Tha Sgìre a' Mhonaidh Ruaidh a' sealltainn iarrtas làidir airson Iomairt Gàidhlig a' Mhonaidh Ruaidh. Chaidh a' bhuidheann "Gàidhlig anns a' Phàirc" a stèidheachadh le Comhairle na Gàidhealtachd, SINNE agus a' choimhearsnachd bho chionn dà bhliadhna a tha toirt còmhla buidhnean bhon sgìre. Tha iad a-nis a' dèanamh strì airson an Iomairt Gàidhlig aca fhèin.

Le plana Gàidhlig ga uallachadh le Pàirc Nàiseanta a' Mhonaidh Ruaidh agus ionad Gàidhlig ann am Baile Ùr an t-Sleibhe, tha deagh bhùn-stèidhe aca airson an àm ri teachd.

Còmhradh ri Oileanaich aig an t-Sabhal

2009-10-27T13:09:00.003Z

Fhuair sinn cothrom bruidhinn ri oileanaich aig Sabhal Mòr Ostaig Diluain 26 Dàmhair. Bha còmhradh glè inntinneach againn air Iomairtean Gàidhlig agus obair ChnaG anns an fharsaingeachd.

Tha cuspairean rim faighinn aig an t-Sabhal co-cheangailte ri leasachadh cànain agus na tha tachairt ann an saoghal leasachaidh na Gàidhlig. Tha e gu math cudromach gu bheil buidhnean Gàidhlig agus buidhnean foghlaim ag obair còmhla gus a' bhuannachd as fheàrr fhaighinn don Ghàidhlig.

Chaidh ceist a chur oirnn am bu choir do dh'oileanaich a bhith cur a-steach airson obraichean le buidhnean mar ChnaG. Tha freagairt simplidh ann - bu chòir. Tha sinn a' cur fàilte air iarrtasan bho oileanaich 's eile nuair a tha cothroman-obrach againn. Chan eil teagamh gum bi cothroman a bharrachd rim faighinn san àm ri teachd.

Taic-airgid do ghnìomhachsan

2009-10-23T16:06:00.008+01:00

Bha CnaG ann an sgìre Loch Carrann ann an Taobh Siar Rois an dè a' sgaoileadh pasgain soidhnichean dà chànanach. Bidh sinn a' tadhail air bùithean, taighean-òsda agus gnìomhachasan de gach seòrsa gus innse dhaibh mun sgeama taic-airgid airson soidhnichean dà-chànanach. Tha an sgeama air maoineachadh le Iomairt na Gàidhealtachd 's nan Eilean, agus gheibh gnìomhachas no buidheann 60-80% de na cosgaisean airson soidhnichean dà-chànanach a chur suas, taobh a staigh no taobh a muigh nan toglaichean. Tuilleadh fiosrachaidh an seo.

Tuilleadh feum ga chur air a' Ghàidhlig

2009-10-21T16:55:00.004+01:00

Tha comas labhairt ann an Gàidhlig cudromach ann an Alba agus air aithneachadh mar sgìl san àite-obrach.

Tha sinn toilichte a ràdh gu bheil Ionad Sgithidh a' Chàrn Ghuirm a-nis a' cur tuilleadh feum air a' Ghàidhlig mar phàirt den Phlana Gàidhlig aca. Chaidh am foirm-iarrtais aca a leasachadh gus ceist a chur ann mu chomas ann an Gàidhlig.

Leis fhèin, chan eil seo cho bunaiteach ach thèid a chleachdadh mar dhòigh gus tuilleadh Gàidhlig a thoirt a-steach gu obair an Ionaid. Bidh tuilleadh leasachaidhean ri thighinn a thaobh spòr-sneachda san àm ri teachd.

Tha sinn an dòchas gum bi tòrr sneachda ann am bliadhna 's an dùil ri seusain glè shoibheachail.

Tuilleadh adhartais ann an Loch Abair

2009-10-21T16:18:00.007+01:00

Bidh clasaichean Gàidhlig a' tòiseachadh ann an Sgìre Loch Abair a dh'aithghearr. Thèid an cur air dòigh le trì buidhnean air an co-òrdanachadh le Iomairt Gàidhlig Loch Abair. 'S iad Colaiste Loch Abair, Clì Gàidhlig agus Buidheann Leasachaidh na Gàidhlig Loch Abair.

Tha clasaichean rim faighinn sa Ghearasdan, Inbhir Garradh, Malaig, Sròn an t-Sithein, Baile a' Chaolais, Cill Chomhghain agus An Drochaid Ruaidh. Bidh clasaichean neo-fhoirmeil, còmhraidh 's Ulpan ann. Gheibhear fiosrachadh a bharrachd air làrach-lìn Iomairt Gàidhlig Loch Abair.

'S e seo a' chiad turas a bhios an dòigh-teagaisg Ulpan ri fhaighinn ann an Loch Abair agus an dùil ri leudachadh san àm ri teachd. Tha Ulpan air dearbhadh gu bheil daoine a' tighinn gu fileantas ann an dòigh adhartach. Tha feum air clasaichean tradaiseanta fhathast ged tha airson gnathsan-cainnt 's eile.

Tha Buidheann Leasachaidh na Gàidhlig Loch Abair gu bhith cur air dòigh turas do Shabhal Mòr Ostaig. Bidh seo fosgailte do luchd-ionnsachaidh à Loch Abair. Cum sùil air làrach-lìn Iomairt Gàidhlig Loch Abair airson fiosrachadh.

Tha sinn glè thoilichte soidhnichean dà-chànanach ùra fhaicinn sa Ghearasdan. Thug sinn taic-airgid 's taic le cànan don Mountain Warehouse a tha air gluasad a-steach dhan seann bhùth aig Woolworths.

A thaobh leasachadh, tha soidhnichean dà-chànanach agus Gàidhlig a-mhàin nam pàirt cudromach ann an ath-bheothachadh a' chànain. Tha iad a' cur ri fàs na Gàidhlig le bhith ag àbhaisteachadh a' chànain ann an coimhearsnachdan. Tha seo gu sònraichte cudromach don ghinealach òga 's gum faic iad Gàidhlig taobh a-muigh na sgoile.

Tilleadh Dhachaigh a Dhùthaich MhicAoidh

2009-10-13T14:35:00.007+01:00

Tha Urras Coimhearsnachd Dùthaich MhicAoidh air a bhith trang a' brosnachadh na Gàidhlig le tachartasan ann an diofar choimhearsnachdan. Tha rannsachadh a' tachairt agus tha coinneamhan ionadail gan cumail ann an diofar bailtean mu 'n t-slighe air adhart airson na Gàidhlig.

Tha iad cuideachd a' reic lèintean-t Gàidhlig agus suiteas Gàidhlig mar a chithear san dealbh seo!

Cur 's Fàs - Am Foghar 2009

2009-10-13T12:20:00.004+01:00

Tha Cùr 's Fàs a-nis a-muigh 's air sgaoilleadh air feadh na Gàidhealtachd. Tha an iris seo air fhoillseachadh le Comunn na Gàidhlig 's air a chumail a' dol le sanasachd.

Thòisich e mar phàirt de Phlana Gàidhlig Inbhir Nis 's Inbhir Narann, nach eil ann tuilleadh, agus dh'fhàs e thar na blidhnaichean gu ìre chomearsealta.

A bharrachd air naidheachdan mun Ghàidhlig fhèin, gheibhear fiosrachadh air buidhnean eile agus tachartasan a' gabhail àite anns na mìosan a tha romhainn.

Gheibh sibh lethbhreac ann an cruth PDF an seo.

Clàr-bìdh dà-chànanach ann an Inbhir Nis

2009-10-13T11:47:00.006+01:00

Tha Taigh-òsta Rìoghail na Gàidhealtachd air clàran-bìdhe dà-chànanach fhoillseachadh. Le taic bho Chomunn na Gàidhlig, chaidh an clàr-bìdh a dh'eadar-theangachadh 's a chur an clò.

Thog na meadhanan air seo le pìos air BBC An Là agus sa Ph&J an seo Tha Manaidsear an taigh-òsta mar-thà ag innse gu bheil aoighean a' cur fàilte air seo, ged nach eil iad uile ga thuigsinn, agus a' faicinn an leasachaidh seo cudromach ann an ath-bheothachadh na Gàidhlig.

Fhuair an Taigh-òsta taic bho ChnaG tron Sgeama Soidhnichean Dà-chànanach againn. Tha seo mar phàirt de mhaoineachadh aig Iomairt na Gàidhealtachd 's nan Eilean.

Tha sinn a' faicinn tuilleadh iarrtasan am bliadhna air feadh na Gàidhealtachd. Dh'fhaodadh seo a bhith air sgath 's a' chonspaid a thaobh soidhnichean rathaid ach tha sinn a' cur fàilte air gach iarrtas.

Gàidhlig ann an Loch an Inbhir

2009-10-09T12:03:00.005+01:00

Bidh CnaG a' cumail latha fiosrachaidh Gàidhlig ann an Loch an Inbhir air Disathairne 28mh Samhain. Tha cuireadh ann do dhaoine ann an Asainte aig a bheil ùidh ann an Gàidhlig agus gu sònraichte pàrantan a tha ag iarraidh fiosrachadh mu foghlam Gàidhlig.

Tha clasaichean Gàidhlig a' dol ann an Loch an Inbhir aig Ionad Spòrs Asainte, agus anns An Stòr cuideachd.

Ma tha sibh ann an Loch an Inbhir feuch gun tadhail sibh air bùth leabharaichean Achins - tha tòrr leabhraichean aca - feadhainn Gàidhlig nam measg - deagh bùth cofaidh agus preasantan is eile.

Ainmean-àite na h-Alba

2009-10-08T14:57:00.003+01:00

Tha CnaG air a bhith cur taic ri Ainmean-Àite na h-Alba agus an GNLC roimhe. Tha sinn nar ball air a' bhuidheann seo a tha na buidheann comhairleachaidh nàiseanta air ainmean-àite Gàidhlig.

Chan e obair shimplidh a tha seo agus feumar beachdan 's stiùireadh a thoirt a-steach bho thòrr àitean. Tha iad a' dèanamh adhartas ged tha agus ag obair a dh'ionnsaigh a' chlàir-àite naiseanta, stòrdata de ainmean-àite Gàidhlig.

Tha na buill eile uile air buannachd fhaighinn aisde cuideachd. Comhairlean ionadail le stiùireadh 's taic le soidhnichean dà-chànanach, Bòrd na Gàidhlig le bhith cur an gnìomh Plana Nàiseanta na Gàidhlig. Bidh buannachd cuideachd ann do bhuidhnean pholblach aig a bheil planaichean Gàidhlig. Ach as cudromaiche, 's dòcha, 's e a' bhuaidh a bhios aig AÀA air misneachd coimhearsnachdan Gàidhlig air sgath 's na h-obrach seo.

Làrach-lìn ùr airson Iomairt Gàidhlig Loch Abair

2009-10-06T17:10:00.011+01:00

Tha sinn air a bhith trang, gu math trang, ann an Loch Abair. An diugh chaidh làrach-lìn airson na h-iomairt a chur air dòigh anns an Drochaid Ruaidh. Chìthear an làrach-lìn an seo.

Tha sinn an dùil gum bi an làrach na ghoireas dhan sgìre air fad le fiosrachadh air foghlam tro mheadhan na Gàidhlig, cothroman do luchd-labhairt 's eile. San àm ri teachd bidh sinn a' foillseachadh stòrdata le companaidhean 's seirbheisean tron Ghàidhlig ann an Loch Abair.

Tha am pròiseact seo mar phàirt de Iomairt Gàidhlig Loch Abair, aon de na seachd sgìrean a chaidh ainmeachadh mar phrìomhachas sa Ghiblean. Tha cuisean a' gluasad anns na sgìrean eile cuideachd 's an dùil ri làrach-lìn eile airson gach sgìre.

Le bhith toirt prìomhachas air cuid de sgìrean, bidh sgìrean eile ann nach eil a' faighinn prìomhachas. Tha e follaiseach gu bheil iarrtas ann an sgìrean eile airson an Iomairt aca fhèin. Chan eil adhbhar nach tachair sinn ach dìth ghoireasan agus ionmhais.

'S e goireas air leth a tha ann an Sgoil Àraich Bràigh Loch Abair a chaidh leasachadh mar phàirt de Taigh na Sgoile. Fhuair am proiseact seo taic bho ChnaG ann an 2004 agus 2005 agus a-nis a' toirt seachad cùram chloinne tro mheadhan na Gàidhlig.

A bharrachd air cùram chloinne, tha seòmar ionnsachaidh ann agus goireas shuas an staidhre airson òigridh. Bha e math pàrantan fhaicinn 's clann a' bruidhinn na Gàidhlig aig aois òg. 'S math rinn a' bhuidheann-stiùiridh agus an luchd-obrach.

Tìr nam Beann, Tìr nan Gleann, Tìr nan Gaisgeachd - Sin a chaidh a ràdh mu Loch Abair agus tha beanntan gu leòr an seo. Bho Bhràigh Loch Abair chìthear An t-Aonach Mòr far a bheil Ionad Sgìthidh "Monadh Nibheis".

Chùir CnaG taic ris na h-ionadan-sgithidh air fad nas traithe am bliadhna seo 's chuir iad soidhnichean dà-chànanach suas. A bharrachd air soidhnichean tha na h-ionadan a' cur an gnìomh planaichean Gàidhlig, na ciad planaichean Gàidhlig sa roinn phrìobhaidaich. Chan eil feum ann am plana as aonais gnìomh ged tha agus tha sinn toilichte fhaicinn gu bheil an t-adhartas a' leantainn.

Cuisean a' gluasad ann an Duthaich MhicAoidh

2009-10-06T16:56:00.009+01:00

Tha sinn air a bhith cur taic ri buidheann ann an Duthaich MhicAoidh agus Asainte. Tha tòrr chothroman sa sgìre seo a thaobh na Gàidhlig ach chan eil mòran goireasan Gàidhlig rin cleachdadh. Mar sin bidh dubhlan ann ath-bheothachadh a thoirt air a' chànan.

Tha cuisean a' coimhead dòchasach ged tha! Chuir sinn air doigh Còmhlann Gàidhlig Asainte nas traithe am bliadhna agus iad air tachartasan a chur air adhart. Tha sinn a-nis a' cur taic riutha le ceanglaichean a dhèanamh le coimhearsnachdan nas fhaide gu tuath.

Chuir sinn taic do dh'Urras Duthaich MhicAoidh le sgrùdadh coimhearsnachd agus an dùil seòrsa de phlana sgìreil a dhealbh thar na mìosan a tha romhainn. Thèid an aithris fhoillseachadh san Dubhlachd nuair a bhios buidhnean coimhearsnachd a' tighinn còmhla gus beachdachadh air an t-slighe air adhart.

Chan eil adhbhar nach tèid an sgìre seo a chomharradh mar Iomairt Gàidhlig Duthaich MhicAoidh.

Baidhsagalan san Eilean Dubh

2009-09-14T20:33:00.004+01:00

Bidh sinn a' cur taic ri òigridh le Gàidhlig le tachartasan spòrs 's eile. Tha obair òigridh gu math cudromach ann an leasachadh na Gàidhlig agus cothroman Gàidhlig a bhruidhinn taobh a-muigh na sgoile.

Chuir sinn seachad madainn air an Eilean Dubh faisg air Cromba far a bheil slighean-baidhc de gach seòrsa. 'S ann le Comeisean na Coiltearachd a tha an t-àite seo agus tha diofar ìrean ann: Uaine (furasta), Gorm (meadhanach), Dearg (doirbh) agus Dubh a tha glè adhartach. Rinn sinn na slighean uaine, gorm agus mu dheireadh an tè dhearg far an robh fìor spòrs againn.

Chìthear an t-slighe a ghabh sinn air an làimh chlì.

Toraidhean air tachartasan

2009-09-04T16:03:00.003+01:00

As dèidh dhuinn "An Cruinneachadh" a chumail ann an Loch Abair, seall gu h-ìosal, tha sinn air dealbh a chruthachadh a tha sealltain cuid de na beachdan aig an òigridh.

An Cruinneachadh - Iomairt Gàidhlig Loch Abair

2009-08-28T22:40:00.006+01:00

Mar phàirt de phlana-obrach Iomairt Gàidhlig Loch Abair, chaidh "An Cruinneachadh" a chumail air Outward Bound Loch Iall. Bha seo a' toirt còmhla sgoilearan à Àrd-sgoiltean Loch Abair, Àird nam Murchan agus Malaig.

Bha dà amas againn: 1. Spòrs tro mheadhan na Gàidhlig agus 2. rannsachadh air na seòrsa thachartasan a tha dhìth air an òigridh tro mheadhan na Gàidhlig.

Tha sinn toilichte a ràdh gun deach an dà amas seo a choileanadh!

Gàidhlig aig na h-Ionadan Sgithidh

2009-08-28T11:19:00.004+01:00

Tha sinn air tòrr obair a dhèanamh le ionadan sgithidh na h-Alba thairis air a' bhlidhna a chaidh seachad. Tha an obair seo air soidhnichean, trèanadh agus mapaichean-slighe a thoirt a-steach 's paighichte le CnaG agus Bòrd na Gàidhlig. Seo agaibh aithris a bh' air BBC Alba sa Mhàirt:

Thug sinn taic do VisitScotland cuideachd le bhith ath-leasachadh na mapaichean aca gu cruth dà-chànanach.
Tha na leasaichean seo air a dhol air adhart aig An Leac, Gleann Sìth, Monadh Nibheis, Gleann Comhann agus An Càrn Gorm.

Tha sinn an dòchas tuilleadh taic a thoirt do Ionadan Sgithidh na h-Alba sa àm ri teachd.